இலங்கை கிரிக்கெட்டின் முன்னணி உள்ளூர் போட்டியான ஸ்ரீலங்கா கிரிக்கெட் (SLC) மேஜர் கிளப் டி20 (Major Clubs T20 Tournament 2026) தொடரில் வீரர் ஒருவர் காயமடைந்த சம்பவத்தைத் தொடர்ந்து, போட்டி மைதானங்களில் வழங்கப்படும் மருத்துவ மற்றும் அவசரகால வசதிகள் குறித்து கடுமையான கேள்விகள் எழுந்துள்ளன. கொழும்பு ஆர். பிரேமதாச சர்வதேச கிரிக்கெட் மைதானத்தில் நடைபெற்ற SSC–NCC அரையிறுதிப் போட்டியின்போது, பந்துவீசும் நிலையில் சாமிக்க குணசேகர காயமடைந்ததாக தெரிவிக்கப்பட்டுள்ளது.
பந்துவீசியபோது அவர் எதிர்பாராத விதமாக தரையில் விழுந்ததாகவும், உடனடியாக மருத்துவ உதவியும் மைதானத்திலிருந்து வெளியேற்றும் நடவடிக்கையும் தேவைப்பட்டதாகவும் தெரிவிக்கப்படுகிறது. காயத்தின் தன்மை மற்றும் தீவிரம் இதுவரை அதிகாரப்பூர்வமாக உறுதிப்படுத்தப்படவில்லை. ஆனால் சம்பவம் இடம்பெற்ற நேரத்தில் மைதானத்தில் மருத்துவர், ஆம்புலன்ஸ் அல்லது காயமடைந்த வீரரை எடுத்துச் செல்லக்கூடிய ஸ்ட்ரெச்சர் கூட உடனடியாக இருக்கவில்லை என சம்பவத்தை நேரில் பார்த்த அதிகாரி ஒருவர் தெரிவித்துள்ளதாக செய்தி வெளியிபட்டுள்ளது.
இதன் காரணமாக குணசேகரரை மருத்துவமனைக்கு அழைத்துச் செல்ல சுமார் 45 நிமிடங்கள் எடுத்ததாகவும் தெரிவிக்கப்பட்டுள்ளது. மேலும், அவரை மைதானத்திலிருந்து எடுத்துச் செல்ல முறையான ஸ்ட்ரெச்சர் இல்லாத நிலையில், வீரர்களுக்கான மசாஜ் படுக்கை ஒன்றை தற்காலிக ஸ்ட்ரெச்சராக பயன்படுத்தியதாக சம்பவ இடத்தில் இருந்த வீரர் ஒருவர் கூறியுள்ளார்.
இச்சம்பவம் குறிப்பாக முக்கியத்துவம் பெறுவதற்கு காரணம், போட்டி நடைபெற்றது இலங்கையின் மிக முக்கியமான சர்வதேச கிரிக்கெட் மைதானங்களில் ஒன்றான ஆர். பிரேமதாச மைதானத்தில் என்பதாகும். அத்துடன், இந்த மைதான வளாகத்திலேயே இலங்கை கிரிக்கெட்டின் High Performance Centre அமைந்துள்ளது. நாட்டின் முன்னணி வீரர்கள் பங்கேற்கும் உயர்மட்ட உள்ளூர் போட்டியொன்றில் கூட அவசர மருத்துவ வசதிகள் போதுமான அளவில் இல்லை என்ற குற்றச்சாட்டு எழுந்திருப்பது பல்வேறு தரப்பினரிடையே கவலையை ஏற்படுத்தியுள்ளது.
விளையாட்டு வீரர்களின் பாதுகாப்பை உறுதி செய்வதில் மருத்துவக் குழு, ஆம்புலன்ஸ், ஸ்ட்ரெச்சர் உள்ளிட்ட அவசரகால வசதிகள் அடிப்படைத் தேவைகளாகக் கருதப்படுகின்றன. குறிப்பாக கிரிக்கெட்டில் வேகப்பந்து வீச்சாளர்கள், துடுப்பாட்ட வீரர்கள் மற்றும் களத்தடுப்பு வீரர்களுக்கு கடுமையான காயங்கள் ஏற்படக்கூடிய சூழ்நிலைகள் இருப்பதால், காயம் ஏற்பட்ட உடனேயே தகுந்த மருத்துவ உதவி கிடைப்பது மிகவும் முக்கியமானது.
இதனால், இந்தச் சம்பவம் தொடர்பாக இலங்கை கிரிக்கெட் நிர்வாகம் மருத்துவ மற்றும் அவசரகால ஏற்பாடுகளை மறுபரிசீலனை செய்ய வேண்டுமா, முக்கிய உள்ளூர் போட்டிகளுக்கு கட்டாய மருத்துவ வசதிகள் மற்றும் ஆம்புலன்ஸ் ஏற்பாடுகள் உள்ளனவா, அவை போட்டி தொடங்குவதற்கு முன்னர் முறையாக பரிசோதிக்கப்படுகின்றனவா என்ற கேள்விகள் தற்போது எழுந்துள்ளன. சம்பவம் தொடர்பான மேலதிக தகவல்களும், வீரரின் காயத்தின் தற்போதைய நிலையும் வெளியாக வேண்டியுள்ளது.
