இலங்கையில் பதிவு செய்யப்பட்ட ஆறு நிறுவனங்களின் சொத்துக்கள் முடக்கப்பட்டுள்ளதாக இலங்கை மத்திய வங்கி அறிவித்துள்ளது.
இந்த உத்தரவுகள், மத்திய வங்கியின் வங்கி சாரா நிதி நிறுவனங்கள் மேற்பார்வைத் துறையின் பணிப்பாளரால், 2011ஆம் ஆண்டின் 42ஆம் இலக்க நிதி வணிகச் சட்டத்தின் 44-ஆம் பிரிவின் கீழ் பிறப்பிக்கப்பட்டுள்ளன.
நாட்டில் இயங்கிவரும் ஆறு நிறுவனங்கள் மற்றும் அவற்றின் பணிப்பாளர்களின் அனைத்துச் சொத்துக்களையும் உடைமைகளையும் கைமாற்றுவதையோ, விற்பனை செய்வதையோ அல்லது வேறுவிதமாகக் கையாள்வதையோ தடுக்கும் வகையில், 2011-ஆம் ஆண்டின் 42-ஆம் இலக்க நிதி வணிகச் சட்டத்தின் விதிகளின் கீழ் முடக்குதல் உத்தரவுகள் பிறப்பிக்கப்பட்டுள்ளதாக இலங்கை மத்திய வங்கி தெரிவிக்கிறது.
கொழும்பு உயர் நீதிமன்றம், மத்திய வங்கியின் இடைநீக்க உத்தரவுகளை உறுதிசெய்து நீடித்துள்ளது.
சொத்து முடக்க உத்தரவுகளுக்கு உட்பட்ட நிறுவனங்கள்:
1. கசகலா கிரீன் பிளான்டேஷன் பிரைவேட் லிமிடெட்,
2. சிலோன் கிரீன் லைஃப் பிளான்டேஷன் பிரைவேட் லிமிடெட்,
3. சின்ஹா கெபிடல் இன்வெஸ்ட்மென்ட் லிமிடெட்
4. புரோ ஷாப் அட்வர்டைசிங் ஹோல்டிங்ஸ் பிரைவேட் லிமிடெட்,
5. ஏதென்ஸ் சர்வதேச கல்வி மையம் பிரைவேட் லிமிடெட்,
6. ஏயோன் லங்கா இன்வெஸ்ட்மென்ட் அண்ட் ஃபிலிம் புரொடக்க்ஷன் இன்டர் நெஷனல் பிரைவேட் லிமிடெட்,
முதல் இரண்டு நிறுவனங்கள் தொடர்பாக நிதி வணிகச் சட்டத்தின் 42ஆவது பிரிவின் கீழ் தற்போது விசாரணைகள் நடைபெற்று வரும் நிலையில், மீதமுள்ள நான்கு நிறுவனங்கள் சட்டவிரோதமாகப் பொது வைப்புகளை ஏற்றுக்கொண்டு, நிதி வணிகச் சட்டத்தை மீறி நிதி வணிகங்களை நடத்தி வருவதை மத்திய வங்கி ஏற்கனவே உறுதி செய்துள்ளது.
பொதுமக்கள் தாங்கள் கஷ்டப்பட்டு சம்பாதித்த பணத்தை சட்டபூர்வமாக அங்கீகரிக்கப்பட்ட நிதி நிறுவனங்களில் மட்டுமே வைப்பு செய்ய வேண்டும் என்றும், அங்கீகரிக்கப்படாத நிறுவனங்களில் வைப்பு செய்வதன் மூலம் அந்தப் பணத்தை முழுமையாக இழக்கும் கடுமையான அபாயம் உள்ளது என்றும் மத்திய வங்கி வலுவாக வலியுறுத்துகிறது.
1988-ஆம் ஆண்டின் வங்கிச் சட்டம் எண் 30 அல்லது நிதி வணிகச் சட்டத்தின் கீழ் மத்திய வங்கியிடமிருந்து முறையான உரிமம் பெற்ற நிறுவனங்கள் மட்டுமே பொதுமக்களிடமிருந்து வைப்புகளை சட்டபூர்வமாக ஏற்க அனுமதிக்கப்படுகின்றன என்று மத்திய வங்கி குறிப்பிடுகிறது.
