மட்டக்களப்பில் பெண்களுக்கு மயக்க மருந்து கொடுத்து கடத்தி, தங்க ஆபரணங்களை கொள்ளையிட்ட பின்னர் கொலை செய்து கிணற்றில் வீசியதாகக் கூறப்படும் சம்பவம் தொடர்பில் கைது செய்யப்பட்ட ஒரே குடும்பத்தைச் சேர்ந்த மூவரையும் எதிர்வரும் 13ஆம் திகதி வரை விளக்கமறியலில் வைக்குமாறு மட்டக்களப்பு நீதவான் நீதிமன்றம் உத்தரவிட்டுள்ளது.
கணவன், அவரது மனைவி மற்றும் கணவனின் சகோதரர் ஆகிய மூவரே இவ்வாறு தொடர்ந்தும் விளக்கமறியலில் வைக்கப்பட்டுள்ளனர்.
கடந்த மார்ச் 20ஆம் திகதி கொக்கட்டிச்சோலை நெல்லிக்காட்டு வயல் பகுதியில் உள்ள பாழடைந்த கிணற்றில் இருந்து பெண் ஒருவரின் சடலம் மீட்கப்பட்டதுடன், மற்றொரு இளம் தாயும் அவரது மூன்று வயது நான்கு மாத குழந்தையும் உயிருடன் மீட்கப்பட்டனர்.
இதனைத் தொடர்ந்து முன்னெடுக்கப்பட்ட விசாரணைகளில், பெண்களுக்கு மயக்க மாத்திரைகள் கலந்த பழச்சாறு வழங்கி அவர்களை கடத்தி, தங்க ஆபரணங்களை கொள்ளையிட்டதாகவும், சிலரை கொலை செய்து கிணற்றில் வீசியதாகவும் பொலிஸார் தெரிவித்துள்ளனர்.
சம்பவம் தொடர்பில் ஒரே குடும்பத்தைச் சேர்ந்த மூவர் உள்ளிட்ட பலர் கைது செய்யப்பட்டதுடன், இரண்டு முச்சக்கரவண்டிகள், கார் ஒன்று, கூரிய ஆயுதங்கள், மயக்க மருந்துகள், மாத்திரைகள் மற்றும் ஸ்பிரே உள்ளிட்ட பொருட்களும் பொலிஸாரால் கைப்பற்றப்பட்டதாக தெரிவிக்கப்பட்டுள்ளது.
மேலும், கொள்ளையிடப்பட்ட தங்க ஆபரணங்களை கொள்வனவு செய்ததாகக் கூறப்படும் நகைக்கடை உரிமையாளர்கள் உள்ளிட்ட சந்தேகநபர்களும் கைது செய்யப்பட்டிருந்தனர். அவர்களில் சிலர் நீதிமன்ற பிணையில் விடுவிக்கப்பட்டுள்ளனர்.
இந்நிலையில், பிரதான சந்தேகநபர்களான கணவன், மனைவி மற்றும் கணவனின் சகோதரர் ஆகிய மூவருக்கு எதிராக பெண்களை மயக்கமடையச் செய்து கொள்ளையிட்டமை, பெண்ணொருவரை கடத்தி கொலை செய்தமை மற்றும் இளம் தாயை குழந்தையுடன் கடத்திச் சென்று கொள்ளையிட்டு கிணற்றில் வீசியமை உள்ளிட்ட குற்றச்சாட்டுகளின் கீழ் பொலிஸார் வழக்குத் தாக்கல் செய்துள்ளனர்.
குறித்த வழக்கு விசாரணை மட்டக்களப்பு நீதவான் நீதிமன்றில் இடம்பெற்ற நிலையில், மூவரையும் எதிர்வரும் 13ஆம் திகதி வரை விளக்கமறியலில் வைக்குமாறு நீதவான் உத்தரவிட்டு வழக்கை ஒத்திவைத்தார்.
