இன்று இலங்கையின் பல பகுதிகளில் மழை – சில பகுதிகளுக்கு வெப்பமான காலநிலை எச்சரிக்கை

இன்று இலங்கையின் பெரும்பாலான பகுதிகளில்  (08) பிற்பகல் 1 மணிக்குப் பின்னர் மழை அல்லது இடியுடன் கூடிய மழை பெய்யக்கூடும் என வளிமண்டலவியல் திணைக்களம் எதிர்வுகூறியுள்ளது.

வளிமண்டலவியல் திணைக்களம் வெளியிட்டுள்ள அடுத்த 36 மணித்தியாலங்களுக்கான முன்னறிவிப்பின்படி, மேல், சப்ரகமுவ, மத்திய, ஊவா மற்றும் தென் மாகாணங்களிலும் அனுராதபுரம் மாவட்டத்திலும் சில இடங்களில் 75 மில்லிமீற்றருக்கும் அதிகமான ஓரளவு பலத்த மழை பெய்யக்கூடும்.

மேலும், இடியுடன் கூடிய மழை பெய்யும் சந்தர்ப்பங்களில் தற்காலிகமாக பலத்த காற்று வீசுவதுடன் மின்னல் தாக்கங்களும் ஏற்படக்கூடும் என்பதால், பொதுமக்கள் அவதானத்துடன் செயற்படுமாறு அறிவுறுத்தப்பட்டுள்ளனர்.

முக்கிய நகரங்களுக்கான வெப்பநிலை

நாளை கொழும்பில் அதிகபட்ச வெப்பநிலை 32°C ஆகவும், யாழ்ப்பாணத்தில் 33°C ஆகவும், அனுராதபுரத்தில் 34°C ஆகவும், மட்டக்களப்பில் 32°C ஆகவும் காணப்படும் என எதிர்பார்க்கப்படுகிறது.

ரத்தினபுரியில் அதிகபட்சமாக 35°C வெப்பநிலை பதிவாகக்கூடும். கண்டியில் 32°C ஆகவும், நுவரெலியாவில் 21°C ஆகவும் வெப்பநிலை காணப்படும் என முன்னறிவிக்கப்பட்டுள்ளது. பல நகரங்களில் பிற்பகல் 2 மணிக்குப் பின்னர் மழை அல்லது இடியுடன் கூடிய மழைக்கான சாத்தியம் காணப்படுகிறது.

வடக்கு உள்ளிட்ட பகுதிகளில் வெப்ப எச்சரிக்கை

இதனிடையே, வடக்கு, வடமத்திய, கிழக்கு மற்றும் வடமேல் மாகாணங்களிலும் மொனராகலை மற்றும் ஹம்பாந்தோட்டை மாவட்டங்களிலும் நாளை பகல் வேளையில் மனித உடலால் உணரப்படும் வெப்பநிலை ‘அவதானம் செலுத்த வேண்டிய’ மட்டத்தை அடையக்கூடும் என அறிவுறுத்தப்பட்டுள்ளது.

இந்த நேரங்களில் மக்கள் போதுமான அளவு தண்ணீர் அருந்துவதுடன், கடுமையான வெயிலில் நீண்ட நேரம் இருப்பதை தவிர்த்து நிழலான இடங்களில் ஓய்வெடுக்குமாறு அறிவுறுத்தப்பட்டுள்ளது.

மீனவர்கள் மற்றும் கடற்பயணிகளுக்கும் எச்சரிக்கை

மன்னார் முதல் கொழும்பு ஊடாக காலி வரையான கடற்பரப்புகளில் இடியுடன் கூடிய மழை ஏற்படக்கூடும் எனவும், அந்தச் சந்தர்ப்பங்களில் மணிக்கு 60 முதல் 70 கிலோமீற்றர் வரையான தற்காலிக பலத்த காற்று வீசக்கூடும் எனவும் வானிலைத் திணைக்களம் எச்சரித்துள்ளது.

இதனால் குறித்த கடற்பரப்புகள் தற்காலிகமாக மிகவும் கொந்தளிப்பாக மாறக்கூடும் என்பதால், மீனவர்கள் மற்றும் கடற்பயண நடவடிக்கைகளில் ஈடுபடுவோர் அவதானத்துடன் செயற்படுமாறு அறிவுறுத்தப்பட்டுள்ளனர்.

பொதுமக்கள் நாளைய பயணங்கள் மற்றும் வெளிப்புற நடவடிக்கைகளை மேற்கொள்ளும் போது பிரதேசத்திற்குரிய காலநிலை நிலவரங்களை அவதானித்து செயற்படுமாறு அறிவுறுத்தப்படுகின்றனர்.