அமெரிக்காவின் புளோரிடா மாநிலத்தில் கடந்த ஞாயிற்றுக்கிழமை (நவம்பர் 1) இடம்பெற்ற பயங்கர விமான விபத்தில் உயிரிழந்த ஒன்பது பேரில் ஒருவரான 20 வயது பெண் துணை விமானியின் அடையாளம் உறுதிப்படுத்தப்பட்டுள்ளது.
நதாலியா கேடெல்ஹா ஃபில்குவேரஸ் (Nathalia Gadelha Filgueiras) என்ற இளம் விமானியே இவ்விபத்தில் உயிரிழந்துள்ளார். இவர் தனது 17 வயதிலேயே, உயர்நிலைப் பாடசாலையில் கல்வி பயின்றுகொண்டிருந்தபோது தனியார் விமானி உரிமத்தைப் பெற்றிருந்தார்.
சிறுவயதிலிருந்தே விமானப் பயணத்தில் ஆர்வம் கொண்டிருந்த அவர், எதிர்காலத்தில் விமான நிறுவனமொன்றில் விமானியாகப் பணியாற்ற வேண்டும் என்ற இலக்குடன் செயல்பட்டு வந்ததாக அவரது குடும்பத்தினர் தெரிவித்துள்ளனர். விபத்து இடம்பெறுவதற்கு முன்னர் சுமார் ஒன்பது மாதங்களாக வர்த்தக விமானியாகப் பணியாற்றி வந்ததாகவும் தகவல்கள் தெரிவிக்கின்றன.
டெக்சாஸ் மாநிலத்தின் ஆஸ்டின் நகரிலிருந்து பஹாமாஸ் நோக்கிப் பயணித்த Learjet 60 ரக தனியார் விமானம், புளோரிடாவின் பாம் பீச் கவுண்டி பகுதியில் கடந்த ஞாயிற்றுக்கிழமை நண்பகல் சுமார் 12.50 மணியளவில் குடியிருப்புப் பகுதிக்கு அருகில் விழுந்து தீப்பிடித்தது. விமானத்தில் இருந்த ஒன்பது பேரும் உயிரிழந்தனர்.
விபத்துக்கு முன்னர் விமானக் குழுவினர் பனிப்படலம் மற்றும் மிதமான கொந்தளிப்பு நிலை தொடர்பில் விமானப் போக்குவரத்துக் கட்டுப்பாட்டு மையத்துக்கு அறிவித்திருந்தனர். பின்னர் விமானம் திடீரென உயரத்தை இழந்து அவசரநிலையை அறிவித்ததாகவும் தகவல்கள் தெரிவிக்கின்றன.
விமானத்தின் வீழ்ச்சிக்கான காரணம் இதுவரை உறுதிப்படுத்தப்படவில்லை. அமெரிக்க தேசிய போக்குவரத்து பாதுகாப்பு சபை (NTSB) விசாரணைகளை முன்னெடுத்து வருகிறது.
