சவூதி அரேபியாவில் மரண தண்டனை விதிக்கப்பட்டுள்ள சிவராசா அனோஜனுக்கு மன்னிப்புப் பெற்றுக்கொடுக்க அல்லது அவருக்கு வழங்கப்பட்டுள்ள தண்டனையைக் குறைப்பதற்கு அரசாங்கம் இயன்றவரை முயற்சி செய்து வருவதாக சுகாதார மற்றும் ஊடகத்துறை அமைச்சர் நளிந்த ஜயதிஸ்ஸ தெரிவித்துள்ளார்.
இது தொடர்பில் வெளிநாட்டலுவல்கள் அமைச்சுக்குத் தகவல் கிடைத்ததைத் தொடர்ந்து, தேவையான நடவடிக்கைகள் எடுக்கப்பட்டு வருவதாகத் தெரிவித்த அமைச்சர், சம்பந்தப்பட்ட அரசாங்கத்துடன் ஏற்கனவே பல கட்ட கலந்துரையாடல்கள் நடத்தப்பட்டுள்ளதாகவும் கூறினார்.
மேலும், சிவராசா அனோஜனுக்குத் தேவையான சட்டத்தரணி உதவியை வழங்குவதற்குத் தூதரகம் தலையிட்டுள்ளதாகவும், இச்செயற்பாடுகளை ஒருங்கிணைத்து முன்னெடுப்பதற்காக விசேட அதிகாரி ஒருவர் நியமிக்கப்பட்டுள்ளதாகவும் அவர் தெரிவித்தார்.
அதேவேளை, குறித்த சம்பவம் தொடர்பான மேலதிக நடவடிக்கைகள் அனைத்தும் சவூதி அரேபியாவில் நடைமுறையிலுள்ள சட்ட திட்டங்களுக்கு அமைவாகவே முன்னெடுக்கப்பட வேண்டும் என்றும் அமைச்சர் நளிந்த ஜயதிஸ்ஸ மேலும் சுட்டிக்காட்டினார்.
