படல்கம – பேரகஹமங்கட பகுதியில் மாஓயாவில் நீராடச் சென்ற 4 பேர் நீரில் மூழ்கி உயிரிழந்துள்ளனர்.
படல்கம பொலிஸாருக்குக் கிடைத்த தகவலையடுத்து, பொலிஸாரும் பிரதேசவாசிகளும் இணைந்து மேற்கொண்ட தேடுதல் நடவடிக்கையின் மூலம் காணாமல்போன நால்வரின் சடலங்களும் கண்டுபிடிக்கப்பட்டுள்ளன.
உயிரிழந்தவர்கள் படல்கம பகுதியில் அமைந்துள்ள தனியார் கோழி இறைச்சி பொதியிடும் நிறுவனமொன்றில் பணிபுரிந்து வந்த தொழிலாளர்கள் எனத் தெரிவிக்கப்படுகிறது. அவர்களில் ஹப்புத்தளை – ஓஹிய பகுதியைச் சேர்ந்த 25 வயது இளைஞர் ஒருவரும் 28 வயதுடைய பெண் ஒருவரும் அடங்குவர்.
மற்றைய இருவரும் பதுளை மாவட்டத்தின் தெமோதரை – உடுவரை தோட்டம் மேல் பிரிவைச் சேர்ந்த 20, 19 வயதுடையவர்கள் என அடையாளம் காணப்பட்டுள்ளனர்.
மீட்கப்பட்ட சடலங்கள் நீர்கொழும்பு வைத்தியசாலையில் பிரேத பரிசோதனைக்கு உட்படுத்தப்பட்ட பின்னர், இறுதிச் சடங்குகளுக்காக பதுளைக்குக் கொண்டுசெல்லப்பட்டுள்ளன.
உயிரிழந்தவர்களின் இறுதிக்கிரியைகள் நாளை திங்கட்கிழமை (21) நடைபெறவுள்ளதாக உறவினர்கள் தெரிவித்தனர்.
இச்சம்பவம் தொடர்பாக படல்கம பொலிஸார் மேலதிக விசாரணைகளில் ஈடுபட்டு வருகின்றனர்.
