டயகம ஈஸ்ட் பகுதிக்குச் செல்லும் வீதியைப் புனரமைக்குமாறு கோரி, அப்பகுதி மக்கள் இன்று (26) வீதி மறியல் போராட்டத்தில் ஈடுபட்டனர்.
டிட்வா சூறாவளியினால் ஏற்பட்ட மண்சரிவு மற்றும் வெள்ளப்பெருக்கு, அத்துடன் இம்மாதம் 20ஆம் திகதி ஏற்பட்ட வெள்ளப்பெருக்கு காரணமாக, குறித்த வீதியின் பெரும்பகுதி சேதமடைந்துள்ளதாகப் போராட்டத்தில் ஈடுபட்டவர்கள் தெரிவித்தனர்.
தற்போது வீதி மிகவும் மோசமான நிலையில் காணப்படுவதுடன், முச்சக்கர வண்டிகள் மாத்திரமே சில பகுதிகளினூடாகப் பயணிக்கக்கூடிய நிலை காணப்படுவதாகவும் அவர்கள் குறிப்பிட்டனர். வீதியில் அடிக்கடி விபத்துகள் இடம்பெற்று பலர் காயமடைந்துள்ளதாகவும் தெரிவிக்கப்பட்டது.
இந்த வீதியைப் பயன்படுத்தும் கர்ப்பிணித் தாய்மார்கள், பாடசாலை மாணவர்கள் மற்றும் பொதுமக்கள் பல்வேறு அசௌகரியங்களை எதிர்நோக்கி வருவதாகப் போராட்டக்காரர்கள் சுட்டிக்காட்டினர். குறிப்பாக, நிறைமாதக் கர்ப்பிணிகள் மற்றும் தீவிர நோயாளர்களை வைத்தியசாலைகளுக்கு அழைத்துச் செல்வதில் பெரும் சிரமங்கள் ஏற்படுவதாகவும் அவர்கள் தெரிவித்தனர்.
வீதியை உடனடியாகப் புனரமைக்குமாறு வலியுறுத்தி, சாரதிகள், தோட்டத் தொழிலாளர்கள், பாடசாலை ஆசிரியர்கள் மற்றும் பொதுமக்கள் இணைந்து எதிர்ப்பு வாசகங்கள் அடங்கிய பதாதைகளை ஏந்தியவாறு கோஷங்களை எழுப்பினர்.
இந்தப் போராட்டம் காரணமாக அப்பகுதியில் போக்குவரத்தும் பாதிக்கப்பட்டது.
“எமது வீதியைப் புனரமைக்காமல் எந்தவொரு அரசியல்வாதியும் வாக்குக் கேட்டு வரக்கூடாது” எனப் போராட்டத்தில் ஈடுபட்டவர்கள் வலியுறுத்தினர்.
