வங்காள விரிகுடாவில் உருவாகியுள்ள ‘அர்னாப்’ புயல் ஆந்திரப் பிரதேசக் கரையை நோக்கி நகர்ந்து வருவதால், இந்தியாவின் கிழக்குக் கரையோரப் பகுதிகளில் முன்னெச்சரிக்கை நடவடிக்கைகள் தீவிரப்படுத்தப்பட்டுள்ளன.
இந்தப் புயல் ஒக்டோபர் 28ஆம் திகதி புதன்கிழமை முற்பகல், ஆந்திரப் பிரதேசம் மற்றும் யானம் கரையோரப் பகுதிகளில் படாபட்லா – விசாகப்பட்டினம் இடையே கரையைக் கடக்கும் என எதிர்பார்க்கப்படுகிறது.
இந்திய வானிலை ஆய்வு மையத்தின் கணிப்பின்படி, புயல் கரையைக் கடக்கும்போது மணிக்கு 115 முதல் 125 கிலோமீற்றர் வேகத்தில் காற்று வீசக்கூடும். காற்றின் வேகம் மணிக்கு 140 கிலோமீற்றர் வரை அதிகரிக்கலாம்.
ஆந்திராவில் பாடசாலைகளுக்கு விடுமுறை
புயல் முன்னெச்சரிக்கை நடவடிக்கையாக ஆந்திரப் பிரதேசத்தின் பல மாவட்டங்களில் பாடசாலைகளுக்கு விடுமுறை அறிவிக்கப்பட்டுள்ளது. கடற்கரைகளுக்குச் செல்வதற்கும் சில கடலோர வீதிகளில் பயணிப்பதற்கும் கட்டுப்பாடுகள் விதிக்கப்பட்டுள்ளன.
புயலால் பாதிக்கப்படக்கூடும் என அடையாளம் காணப்பட்ட 16 மாவட்டங்களில் 1,763 புயல் பாதுகாப்பு முகாம்களும் 2,907 கட்டுப்பாட்டு அறைகளும் தயார் நிலையில் வைக்கப்பட்டுள்ளதாகத் தெரிவிக்கப்பட்டுள்ளது.
மேலும், 11 அபாயமிக்க மாவட்டங்களில் தேசிய மற்றும் மாநில அனர்த்த மீட்புக் குழுக்கள் தயார் நிலையில் நிறுத்தப்பட்டுள்ளன. மீனவர்களின் பாதுகாப்பைக் கருத்திற்கொண்டு ஆயிரக்கணக்கான மீன்பிடிப் படகுகளும் பாதுகாப்பான இடங்களில் நிறுத்தப்பட்டுள்ளன.
விமானப் பயணங்களுக்கு பாதிப்பு ஏற்படலாம்
புயல் காரணமாக ஒக்டோபர் 27ஆம் திகதி விசாகப்பட்டினம் மற்றும் விஜயவாடா விமான நிலையங்களுக்கான விமானப் பயணங்களில் பாதிப்புகள் ஏற்படக்கூடும் என ஏர் இந்தியா எச்சரிக்கை விடுத்துள்ளது.
பயணிகள் விமான நிலையத்திற்குப் புறப்படுவதற்கு முன்னர் தங்களது விமானப் பயண நிலையை உறுதிப்படுத்திக்கொள்ளுமாறு அறிவுறுத்தப்பட்டுள்ளனர்.
ஒடிசாவிலும் கனமழை எச்சரிக்கை
ஒடிசா மாநிலத்தின் பல மாவட்டங்களுக்கும் கனமழை எச்சரிக்கை விடுக்கப்பட்டுள்ளது. பூரி, கஜபதி, கஞ்சம், ராயகடா, கோராபுட் மற்றும் மல்கான்கிரி ஆகிய மாவட்டங்களில் மிகக் கனமழை பெய்யக்கூடும் என எதிர்பார்க்கப்படுகிறது.
இதனையடுத்து, சிலிக்கா ஏரியில் சுற்றுலாப் படகு மற்றும் படகுப் போக்குவரத்துச் சேவைகள் ஒக்டோபர் 26ஆம் திகதி முதல் 29ஆம் திகதி வரை இடைநிறுத்தப்பட்டுள்ளன.
‘அர்னாப்’ என்ற பெயர் ஏன்?
‘அர்னாப்’ என்ற பெயரை பங்களாதேஷ் வழங்கியுள்ளது. வட இந்தியப் பெருங்கடல் பகுதியில் உருவாகும் வெப்பமண்டலப் புயல்களுக்கு, உலக வானிலை அமைப்பு மற்றும் ஆசிய – பசிபிக் பொருளாதார மற்றும் சமூக ஆணைக்குழுவின் புயல் பெயரிடும் முறைமைக்கு அமையப் பெயர்கள் வழங்கப்படுகின்றன.
பொதுமக்களுக்கு அறிவுறுத்தல்
புயல் மற்றும் கனமழை நிலவும் காலங்களில் பொதுமக்கள் தேவையற்ற பயணங்களைத் தவிர்க்குமாறும், மரங்கள், மின்கம்பங்கள் மற்றும் பலவீனமான கட்டடங்களிலிருந்து விலகியிருக்குமாறும் அறிவுறுத்தப்பட்டுள்ளனர்.
வெள்ள அபாயம் உள்ள தாழ்வான பகுதிகளில் வசிப்போர் அதிகாரிகளின் அறிவுறுத்தல்களைப் பின்பற்றுவதுடன், மீனவர்கள் மறு அறிவிப்பு வரும் வரை கடலுக்குச் செல்வதைத் தவிர்க்க வேண்டும்.
