அகமதாபாத்தில் நடைபெற்ற சர்வதேச கிரிக்கெட் கவுன்சில் (ICC) கூட்டத்தில், கிரிக்கெட் போட்டிகளின் சுவாரசியத்தை அதிகரிக்கவும் நேர விரயத்தைத் தடுக்கவும் பல முக்கிய புதிய முடிவுகள் எடுக்கப்பட்டுள்ளன.
டெஸ்ட் போட்டிகளின் போது போதிய வெளிச்சமின்மையால் (Bad Light) ஆட்டம் பாதிக்கப்படுவதைத் தடுக்க, இரு அணிகளின் முன்தீர்மானிக்கப்பட்ட சம்மதத்துடன் சிவப்பு பந்துக்கு பதிலாக பிங்க் நிற பந்தைப் பயன்படுத்தி பகல் நேர டெஸ்ட் போட்டிகளிலேயே விளையாடும் புதிய சோதனை முயற்சிக்கு ஐசிசி அனுமதி அளித்துள்ளது.
எனினும், ஜூன் 4ஆம் தேதி தொடங்கும் இங்கிலாந்து – நியூசிலாந்து தொடரில் இந்த விதிமுறை அமலுக்கு வராது.
ஒருநாள் மற்றும் டி20 போட்டிகளின் போது, திட்டமிடப்பட்ட குடிநீர் இடைவேளையின் (Drinks Interval) போது தலைமைப் பயிற்சியாளர்கள் அல்லது நியமிக்கப்பட்ட ஊழியர்கள் மைதானத்திற்குள் சென்று வீரர்களுடன் ஆலோசனை நடத்த ஐசிசி அனுமதி வழங்கியுள்ளது.
ஐபிஎல் போன்ற தொடர்களில் உள்ள இந்த ‘Strategic Timeout’ முறை இப்போது சர்வதேச கிரிக்கெட்டிலும் அறிமுகமாகிறது.
துடுப்பாட்ட வீரர்கள் கிரீஸிற்குள் நகர்ந்து விளையாடும் போது, லெக்-சைடு வைட்களை நடுவர்கள் துல்லியமாக தீர்மானிக்க உதவும் வகையில் வழிகாட்டு கோடுகளை (Guide Lines) பயன்படுத்தும் நடைமுறை நிரந்தரமாக்கப்பட்டுள்ளது.
சர்வதேச டி20 போட்டிகளில் இன்னிங்ஸ் இடைவேளை இனி 15 நிமிடங்களாக இருக்கும்.
ஆட்டம் மீண்டும் தொடங்கும் போது பேட்டர்கள் உடனடியாக தயாராக இருக்க வேண்டும்.
பந்துவீச்சாளர்களின் சந்தேகத்திற்குரிய பந்துவீச்சு முறைகள் (Suspect Bowling Actions) குறித்து நடுவர்கள் அறிக்கை சமர்ப்பிக்கும் போது, அவர்களுக்கு உதவ ஹாக்-ஐ (Hawk-Eye) தரவுகளைப் பயன்படுத்த ஐசிசி அனுமதித்துள்ளது.
