ஆழ்கடலில் விபத்துக்குள்ளான பலநாள் மீன்பிடிக் கலன்கள் குறித்து தீவிர அவதானம்!

ஆழ்கடலில் பல்வேறு தொழில்நுட்பக் கோளாறுகள் மற்றும் விபத்துகளுக்கு உள்ளாகியுள்ள இலங்கையின் பலநாள் மீன்பிடிக் கலன்களின் பாதுகாப்பு மற்றும் அவற்றை மீண்டும் கரைக்குக் கொண்டு வரும் பணிகள் குறித்து கடற்றொழில் மற்றும் நீரியல் வளத் திணைக்களம் நேரடித் தலையீடுகளை மேற்கொண்டு வருவதாக அதன் பணிப்பாளர் நாயகம் சுசந்த கஹவத்த தெரிவித்துள்ளார்.

கலன் கண்காணிப்பு மையத்தின் (VMS) தரவுகளின் அடிப்படையில் தற்போது பதிவாகியுள்ள சம்பவங்கள் குறித்து பணிப்பாளர் நாயகம் பின்வரும் தகவல்களை வெளியிட்டார்:

* IMULA 1388 MTR கலன்: இந்தோனேசிய கடல் எல்லைக்கு அருகில் தொழில்நுட்பக் கோளாறு காரணமாக மிதந்துகொண்டிருக்கும் இந்த கலனை மீண்டும் கரைக்கு இழுத்து வருவதற்காக, அதன் உரிமையாளருக்குச் சொந்தமான IMULA 1112 TLE என்ற மற்றுமொரு கலன் கடந்த மே 14 ஆம் திகதி புறப்பட்டுச் சென்றுள்ளது. இது இன்னும் 24 மணி நேரத்திற்குள் விபத்துக்குள்ளான கலன் இருக்கும் இடத்தை சென்றடையும் என எதிர்பார்க்கப்படுகிறது.

* 0700 GLE கலன்: கடலில் விபத்துக்குள்ளாகி கைவிடப்பட்ட இந்தக் கலனில் இருந்த மீனவர்கள் அனைவரும் 1034 GLE கலனால் பாதுகாப்பாக மீட்கப்பட்டுள்ளனர். குறித்த மீனவர்கள் தற்போது அந்த கலனுடன் இணைந்து மீன்பிடி நடவடிக்கைகளில் ஈடுபட்டு வருவது உறுதி செய்யப்பட்டுள்ளது.

* 0181 TCO கலன்: தொழில்நுட்பக் கோளாறுக்கு உள்ளாகியிருந்த இந்தக் கலன், தற்போது 1907 MTR கலன் மூலம் காலி துறைமுகத்திற்கு இழுத்து வரப்படுகிறது. இக்கலன்கள் தற்போது காலியிலிருந்து சுமார் 120 கடல் மைல் தொலைவில் உள்ளதாகத் தெரிவிக்கப்பட்டுள்ளது.

இது குறித்து மேலும் கருத்துத் தெரிவித்த பணிப்பாளர் நாயகம் சுசாந்த கஹவத்த, சர்வதேச கடற்பரப்பில் விபத்துக்குள்ளாகும் கலன்களை மீண்டும் கரைக்கு இழுத்து வருவது என்பது மிக அதிக செலவு மற்றும் நீண்ட காலம் எடுக்கும் ஒரு பணியாகும் எனச் சுட்டிக்காட்டினார்.

“மீன்பிடி நடவடிக்கைகளுக்காகப் புறப்படுவதற்கு முன்னதாக, தமது கலன்களின் தொழில்நுட்பத் தகைமை (Technical Soundness) குறித்து உறுதிப்படுத்துமாறு அனைத்து கலன் உரிமையாளர்களையும் கேட்டுக்கொள்கிறோம். முறையாகத் திருத்தப்பட்ட மற்றும் தொழில்நுட்ப ரீதியாக முழுமையான தகைமையுள்ள கலன்களை மாத்திரம் கடலுக்கு அனுப்புவதன் மூலம் இவ்வாறான விபத்துகளைக் குறைக்க முடியும். இதன் மூலம் மீனவர்களின் உயிர் பாதுகாப்பும், கலன் உரிமையாளர்களின் உடமைப் பாதுகாப்பும் உறுதி செய்யப்படும் என்பதை விசேடமாக வலியுறுத்த விரும்புகிறேன்” என பணிப்பாளர் நாயகம் மேலும் தெரிவித்தார்.