சர்வதேச அரங்கில் சாதனை படைத்த இலங்கை சிறுவன்

உலகின் 11 வயதுக்குட்பட்ட மேசைப்பந்தாட்ட தரவரிசையில் முதலிடத்தில் உள்ள இலங்கையின் தாவி சமரவீர, ஐரோப்பிய போட்டித் தொடரில் தங்கம், வெள்ளி மற்றும் வெண்கலப் பதக்கங்களை வென்று இன்று வியாழக்கிழமை காலை நாடு திரும்பினார்.

கல்சிசை செயின்ட் தோமஸ் கல்லூரி 6ஆம் தர மாணவரான 11 வயது தாவி சமரவீர, தனது தாயாருடன் கட்டார் விமான சேவையின் QR-664 விமானம் மூலம் இன்று காலை கட்டுநாயக்க விமான நிலையத்தை வந்தடைந்தார்.

கொசோவோவில் நடைபெற்ற போட்டியில் 11 வயதுக்குட்பட்ட பிரிவில் தங்கப் பதக்கத்தையும், 13 வயதுக்குட்பட்ட பிரிவில் வெள்ளிப் பதக்கத்தையும் வென்ற அவர், நோர்வேயில் நடைபெற்ற போட்டியில் 13 வயதுக்குட்பட்ட பிரிவில் வெண்கலப் பதக்கத்தையும் கைப்பற்றினார்.

தற்போது உலகின் 11 வயதுக்குட்பட்ட மேசைப்பந்தாட்ட வீரர்களின் தரவரிசையில் முதலிடத்தில் உள்ள தாவி சமரவீர, தெற்காசிய பிராந்தியத்தின் 11 மற்றும் 13 வயதுக்குட்பட்ட பிரிவுகளிலும் முதலிடத்தை தக்கவைத்துள்ளார்.