தற்போது நிலுவையில் உள்ள வாகன இலக்கத் தகடுகளின் நிலுவை, அடுத்த ஆறு மாதங்களுக்குள் தீர்க்கப்படும் என மோட்டார் வாகன போக்குவரத்துத் திணைக்களத்தின் ஆணையாளர் நாயகம் துஷார இந்துனில் பெர்னாண்டோ தெரிவித்தார்.
கடந்த மார்ச் 10 ஆம் திகதி புதிய ஒப்பந்ததாரர் வாகன இலக்கத் தகடுகளைத் தயாரிக்கத் தொடங்கியதிலிருந்து சுமார் 62,000 இலக்கத் தகடுகள் தயாரிக்கப்பட்டுள்ளன.
எனினும், 2023 மற்றும் 2024 ஆம் ஆண்டுகளில் பதிவு செய்யப்பட்ட வாகனங்கள் தொடர்பான சுமார் 32,000 இலக்கத் தகடுகள் இன்னும் நிலுவையில் உள்ளதாக அவர் குறிப்பிட்டார்.
நிலுவைப் பணிகளைத் தீர்க்கும் முயற்சிகளின் ஒரு பகுதியாக, 2025 ஆம் ஆண்டில் பதிவு செய்யப்படும் வாகனங்களுக்கான இலக்கத் தகடுகள் தொடர்பான புதிய ஒப்பந்தம் அடுத்த வாரம் கைச்சாத்திடப்படும் என எதிர்பார்க்கப்படுகிறது.
இந்தப் பணிகள் முழுமையாக முடிந்தவுடன், வாகனம் பதிவு செய்யப்பட்டு சுமார் ஏழு நாட்களுக்குள் இலக்கத் தகடுகளை வழங்க நடவடிக்கை எடுக்கப்படும்.
மேலும், மின்சார வாகனங்களுக்கு முன்புறம் மற்றும் பின்புறம் என இரண்டு பகுதிகளிலும் பொருத்தக்கூடிய விசேட பச்சை நிற இலக்கத் தகடுகள் வழங்கப்படவுள்ளன.
இதேவேளை, வாகனத்தின் பதிவு செய்யப்பட்ட உரிமையாளர் மட்டுமே அதனைச் செலுத்த வேண்டும் என்பதில்லை; தனிநபருக்குச் சொந்தமான வாகனத்தை அவரது வாழ்க்கைத் துணை அல்லது பிள்ளைகளும் இயக்கலாம்.
எனினும், வாகனம் மற்ற நிறுவனத்திற்கோ அல்லது தரப்பினருக்கோ வாடகைக்கு விடப்பட்டால், அது உரிய வாடகைக் காப்பீட்டின் கீழ் மட்டுமே இயக்கப்பட வேண்டும் என்றும் அவர் தெளிவுபடுத்தினார்.
