மட்டக்களப்பில் சிறிய முரல் மீன் பிடிப்பதற்கான சுருக்கு வலை அனுமதிப்பத்திரம் வழங்க, 20 படகு உரிமையாளர்களிடம் இருந்து தலா ரூ.35,000 வீதம் சுமார் ரூ.7 இலட்சம் இலஞ்சமாக பெறப்பட்டதாக குற்றச்சாட்டு முன்வைக்கப்பட்டுள்ளது.
மட்டக்களப்பு ஊழல் மோசடிக்கு எதிரான அமைப்பின் ஊடகப் பேச்சாளர் அந்தனிசில் ராஜ்குமார் இந்தக் குற்றச்சாட்டை முன்வைத்துள்ளார்.
2026ஆம் ஆண்டுக்கான அனுமதிப்பத்திரங்களை புதுப்பிப்பதில் தாமதம் ஏற்படுத்திய கடற்றொழில் மற்றும் நீரியல் வள திணைக்கள அதிகாரிகள், பின்னர் பணம் பெற்றுக்கொண்டு அனுமதிப்பத்திரங்களை வழங்கியதாக அவர் தெரிவித்துள்ளார்.
மேலும், இரண்டு படகுகளுக்கான அனுமதிப்பத்திரத்தை பெறுவதற்காக ரூ.70,000 செலுத்திய ஒருவருக்கு இதுவரை அனுமதிப்பத்திரம் வழங்கப்படவில்லை என்றும் குற்றம் சுமத்தப்பட்டுள்ளது.
இவ்விடயம் தொடர்பில் உடனடி விசாரணை நடத்தி, குற்றச்சாட்டு நிரூபிக்கப்பட்டால் சம்பந்தப்பட்ட அதிகாரிகளுக்கு எதிராக சட்ட நடவடிக்கை எடுக்க வேண்டும் என மீன்பிடி அமைச்சரிடம் கோரிக்கை விடுக்கப்பட்டுள்ளது.
