சீனாவில் தயாரிக்கப்பட்ட சுமார் 30 இலட்சம் ரூபா பெறுமதியான சட்டவிரோத சிகரெட்டுகளை நாட்டுக்குள் கடத்தி வந்து, கட்டுநாயக்க விமான நிலையத்திலிருந்து வெளியேற முற்பட்ட சீன நாட்டுப் பிரஜை ஒருவர் கைது செய்யப்பட்டுள்ளார்.
38 வயதுடைய சீன நாட்டுத் தொழில்நுட்ப வல்லுநரான சந்தேகநபர், சீனாவில் கொள்வனவு செய்த புகையிலைப் பொருட்களுடன் மலேசியாவின் கோலாலம்பூர் ஊடாக எயார் ஏஷியா விமான சேவைக்கு சொந்தமான AK-047 விமானத்தில் நேற்று (21) இரவு 10.30 மணியளவில் கட்டுநாயக்க விமான நிலையத்தை வந்தடைந்துள்ளார்.
அவரது பயணப் பொதிகளை விமான நிலைய பொலிஸ் போதைப்பொருள் ஒழிப்புப் பிரிவினர் சோதனையிட்டபோது, மறைத்து வைக்கப்பட்டிருந்த 20,000 சிகரெட்டுகள் அடங்கிய 100 சிகரெட் பெட்டிகள் கண்டுபிடிக்கப்பட்டுள்ளன.
கைது செய்யப்பட்ட சந்தேகநபர், கைப்பற்றப்பட்ட சட்டவிரோத புகையிலைப் பொருட்களுடன் மேலதிக விசாரணைகளுக்காக இன்று (22) நீர்கொழும்பு நீதிவான் நீதிமன்றத்தில் ஆஜர்படுத்தப்படவுள்ளார்.
