ஆசிரியர் பற்றாக்குறை, நெரிசலான வகுப்பறைகள் மற்றும் மோசமடைந்து வரும் வசதிகளுக்கு எதிர்ப்பு தெரிவித்து, பிரான்ஸ் முழுவதும் ஆயிரக்கணக்கான உயர்நிலைப் பள்ளி மாணவர்கள் பள்ளி வளாகங்களை முற்றுகையிட்டுள்ளனர். மாணவர்களின் இந்த போராட்டத்தினால் 1,200-க்கும் மேற்பட்ட பள்ளிகளின் செயல்பாடுகளை சீர்குலைத்துள்ளதுடன், காவல்துறையினருடனான மோதல்களுக்கும் வழிவகுத்துள்ளது என ராய்ட்டர்ஸ் செய்தி வெளியிட்டுள்ளது.
பிரான்சில் உள்ள சுமார் 3,700 உயர்நிலைப் பள்ளிகளில் மூன்றில் ஒரு பங்கிற்கும் அதிகமானவை கடந்த வியாழக்கிழமை மூடப்பட்டன, மேலும் 400-க்கும் மேற்பட்ட பள்ளிகள் வெள்ளிக்கிழமை மூடப்பட்டதாக கல்வி அமைச்சர் எட்வர்ட் ஜெஃப்ரே குறிப்பிட்டுள்ளார்.
கடந்த மாத இறுதியில் போராட்டங்கள் தொடங்கியதிலிருந்து, ஆயிரக்கணக்கானோர் காயமடைந்துள்ளதாகவும், ஆயிரக்கணக்கானோர் கைது செய்யப்பட்டுள்ளதாகவும், அவர்களில் பலர் சிறார்கள் எனவும் அதிகாரிகள் தெரிவித்தனர்.
இந்தப் போராட்டங்கள், பாரிஸுக்கு அருகிலுள்ள ஆபர்வில்லியர்ஸ் மற்றும் செய்ன்-செயிண்ட்-டெனிஸ் பகுதி உள்ளிட்ட உழைக்கும் வர்க்க சமூகங்களில் தொடங்கி, பின்னர் நாடு தழுவிய அளவில் பரவின.
நிரப்பப்படாத பணியிடங்கள், போதுமான வசதியில்லாத கட்டிடங்கள், நெரிசலான வகுப்புகள், கடினமான பாட அட்டவணைகள் மற்றும் பல ஆண்டுகளாகப் போதுமான முதலீடு இல்லாதது போன்ற சிக்கல்களைப் பள்ளிகள் எதிர்கொள்வதாக மாணவர்கள், பெற்றோர்கள் மற்றும் தொழிற்சங்கங்கள் கூறுகின்றன.
2027-ஆம் ஆண்டுக்கான வரவுசெலவுத் திட்டத்தை நிறைவேற்ற அரசாங்கம் முயன்று வரும் வேளையிலும், அடுத்த ஆண்டு நடைபெறவிருக்கும் ஜனாதிபதித் தேர்தலுக்கு பிரான்ஸ் தயாராகி வரும் வேளையிலும் இந்த அமைதியின்மை ஏற்பட்டுள்ளது.
இந்த முன்மொழிவு கல்விச் செலவினத்தை 1.7% உயர்த்தும் எனவும், கல்விக்கே தொடர்ந்து முன்னுரிமை அளிக்கப்படுவதாகவும், மாணவர் சேர்க்கை குறைந்து வருவதே இந்த குறைந்த அளவிலான உயர்வுக்கு ஒரு காரணம் என்றும் அரசாங்கம் கூறியதாக ராய்ட்டர்ஸ் செய்தி வெளியிட்டுள்ளது.
செய்ன்-செயிண்ட்-டெனிஸ் பகுதியில் உள்ள பள்ளிகளில் மூன்றில் இரண்டு பங்கு பள்ளிகளில் ஆசிரியர் பணியிடங்கள் காலியாக இருப்பதாக ஆசிரியர் சங்கம் கூறுகிறது. ஏழ்மையான புறநகர்ப் பகுதிகளில் உள்ள மாணவர்களும், ஒரு பிள்ளையின் முகவரி அவர்களுக்குக் கிடைக்கும் கல்வியின் தரத்தைத் தீர்மானிக்கக் கூடாது என்று வாதிடுகின்றனர்.
அதே நேரத்தில், கடந்த பத்தாண்டுகளில் ஒரு மாணவருக்கான நிதி ஒதுக்கீடு ஏறக்குறைய மாறாமல் இருந்தபோதிலும், பள்ளிகள் அதிகப் பொறுப்புகளை ஏற்றுக்கொண்டுள்ளதாக ஆசிரியர்களும் ஆராய்ச்சியாளர்களும் கூறுவதாக ராய்ட்டர்ஸ் செய்தி வெளியிட்டுள்ளது.
ஆசிரியர் சங்கங்களும் சில அரசியல் பிரமுகர்களும் இந்தப் போராட்டங்களில் இணைந்துள்ளனர். ஆர்ப்பாட்டங்களில் பங்கேற்கும் ஆசிரியர் சங்கத்தின் தலைவரான சோஃபி வெனிடே, பத்தாண்டுகால வீழ்ச்சிக்கு ஜனாதிபதி இம்மானுவேல் மக்ரோனின் அரசாங்கமே காரணம் என்று குற்றம் சாட்டினார்.
“இம்மானுவேல் மக்ரோனின் 10 ஆண்டுகால ஆட்சிக்குப் பிறகு பொதுக் கல்வி அமைப்பு ஒரு பேரழிவு நிலையில் உள்ளது,” என்று அவர் ஒரு பேரணியின் போது நியூயார்க் டைம்ஸிடம் கூறினார். “அதில் எல்லாமே இல்லை.”
சில மாணவர்களின் குறைகள் நியாயமானவை என்று அரசாங்க அதிகாரிகள் கூறியுள்ளபோதிலும், நகர்ப்புற வன்முறை என அவர்கள் விவரித்ததைக் கண்டித்துள்ளனர். மேலும், தீவிர இடதுசாரியான பிரான்ஸ் அன்பௌட் கட்சி இந்தக் கலவரத்தைத் தூண்டியதாக அவர்கள் குற்றம் சாட்டியுள்ளனர்; இந்தக் குற்றச்சாட்டை அக்கட்சி மறுத்துள்ளது. சாத்தியமான இடங்களில் குற்றவியல் நடவடிக்கைகளை மேற்கொள்ளுமாறும், சேதங்களுக்குப் பெற்றோரைப் பொறுப்பேற்கச் செய்யுமாறும் அரசு வழக்கறிஞர்களுக்கு உத்தரவிட்டுள்ளதாக நீதித்துறை அமைச்சர் ஜெரால்ட் டார்மானின் தெரிவித்தார்.
உயர்கல்விப் பதிவுக்கான சில கட்டணங்களை உயர்த்தும் திட்டத்தைக் கைவிடுவது, மாணவர்களுக்கு அதிகக் குரல் கொடுக்கும் வகையில் பள்ளி நிர்வாக அமைப்பைச் சீரமைப்பது மற்றும் ஆசிரியர் பற்றாக்குறையைச் சமாளிப்பதற்கான நடவடிக்கைகளை மேற்கொள்வது ஆகியவற்றை அரசு மேற்கொள்ளும் என்று ஜெஃப்ரே கூறினார். ஆனால், இந்த நடவடிக்கைகள் போதுமானதாக இல்லை என்று மாணவர் தலைவர்கள் தெரிவித்தனர்.
