இலங்கையின் பல பகுதிகளில் நிலவும் கடும் வறட்சி காரணமாக விவசாயிகள் மட்டுமன்றி வனவிலங்குகளும் பெரும் நெருக்கடியை எதிர்கொண்டு வருகின்றன.
குறிப்பாக வடமத்திய மாகாணத்தின் சில பகுதிகளில் நீர்த்தேக்கங்கள் மற்றும் குளங்களின் நீர்மட்டம் கணிசமாகக் குறைந்துள்ளதால் விவசாய நடவடிக்கைகள் பாதிக்கப்பட்டுள்ளன.
மழை பெய்யாததால் விவசாயக் கிணறுகள் வறண்டு வருவதுடன், பயிர்களுக்கு தேவையான நீரைப் பெற்றுக்கொள்வதும் விவசாயிகளுக்கு சவாலாகியுள்ளது. பல குடும்பங்கள் குடிநீருக்காக அரசாங்கம் மற்றும் தொண்டு நிறுவனங்களின் உதவியை எதிர்பார்க்க வேண்டிய நிலை ஏற்பட்டுள்ளதாக தெரிவிக்கப்படுகிறது.
வறட்சியின் தாக்கம் மனிதர்களுடன் மட்டுப்படாமல் யானைகள், மான்கள் உள்ளிட்ட வனவிலங்குகளையும் பாதித்துள்ளது. நீர்நிலைகள் வற்றியுள்ளதால் வனப்பகுதிகளில் விலங்குகளுக்கான குடிநீர் கிடைப்பது குறைந்துள்ளது.
சில பகுதிகளில் வனவிலங்குகளை பாதுகாப்பதற்காக நீர் தாங்கிகள் மற்றும் குழாய்கள் மூலம் தண்ணீர் வழங்கும் நடவடிக்கைகளும் முன்னெடுக்கப்படுகின்றன.
காலநிலை மாற்றம் மற்றும் எல் நினோ போன்ற காலநிலை நிகழ்வுகள் மழைப்பொழிவு முறைகளில் மாற்றத்தை ஏற்படுத்தியிருக்கலாம் என நிபுணர்கள் தெரிவிக்கின்றனர்.
