சபாநாயகர் ஜகத் விக்கிரமரத்னவுக்கு எதிராக எதிர்க்கட்சியினரால் முன்வைக்கப்பட்ட நம்பிக்கையில்லாப் பிரேரணை மீதான நாடாளுமன்ற விவாதத்தை, காலவரையறையின்றி ஒத்திவைக்கத் தீர்மானிக்கப்பட்டுள்ளது.
இன்று நடைபெற்ற கட்சித் தலைவர்கள் கூட்டத்தில் இந்தத் தீர்மானம் எடுக்கப்பட்டதாக எதிர்க்கட்சியின் பிரதம கொறடா கயந்த கருணாதிலக்க தெரிவித்துள்ளார்.
குறித்த பிரேரணையில் சில தொழில்நுட்பப் பிரச்சினைகள் காணப்படுவதால், அது தொடர்பில் சட்ட மாஅதிபரின் ஆலோசனையைப் பெற்றுக்கொள்ள வேண்டியுள்ளதாக அரசாங்கத் தரப்பு கூட்டத்தில் தெரிவித்ததாக அவர் குறிப்பிட்டுள்ளார்.
கடந்த 9ஆம் திகதி, எதிர்க்கட்சியைச் சேர்ந்த 44 நாடாளுமன்ற உறுப்பினர்களின் கையொப்பங்களுடன் இந்த நம்பிக்கையில்லாப் பிரேரணை நாடாளுமன்ற செயலாளர் நாயகத்திடம் கையளிக்கப்பட்டது.
சபாநாயகருக்கு எதிராக மொத்தம் 50 குற்றச்சாட்டுகள் முன்வைக்கப்பட்டுள்ள இந்தப் பிரேரணை, நாடாளுமன்ற ஒழுங்குப் பத்திரத்திலும் ஏற்கனவே உள்ளடக்கப்பட்டிருந்தமை குறிப்பிடத்தக்கது.
