28 இலட்சம் ரூபாய் பெறுமதியான ஐஸ் போதைப்பொருளுடன் பெண் கைது!
வெல்லம்பிட்டி பகுதியில் வாடகை வீட்டில் தங்கியிருந்த பெண் ஒருவர், சுமார் 28 இலட்சம் ரூபாய் பெறுமதியான ஐஸ் போதைப்பொருளுடன் கைது செய்யப்பட்டுள்ளதாகத் தெரிவிக்கப்படுகிறது.
‘பியூமி’ என அழைக்கப்படும் குறித்த பெண், கடந்த 16ஆம் திகதி வெல்லம்பிட்டி பொலிஸ் பிரிவுக்குட்பட்ட மீதொட்டமுல்ல, பெரேரா மாவத்தையில் வைத்து கைது செய்யப்பட்டுள்ளார்.
நுகேகொடை கோட்ட நச்சுப் போதைப்பொருள் பிரிவின் அதிகாரிகள் முன்னெடுத்த நடவடிக்கையின்போது, சந்தேகநபரிடமிருந்து 274 கிராம் ஐஸ் போதைப்பொருள் கைப்பற்றப்பட்டுள்ளது.
மேலதிக விசாரணைகளின்போது, போதைப்பொருள் கடத்தலில் ஈடுபடுவதாகக் கூறப்படும் தெமட்டகொடை சமிந்தவின் பிரதான கூட்டாளியான தெமட்டகொடை இசுருவின் போதைப்பொருள் விநியோக வலையமைப்புடன் குறித்த பெண்ணுக்குத் தொடர்பு இருப்பதாக விசாரணைகளில் தெரியவந்துள்ளதாகத் தெரிவிக்கப்படுகிறது.
கைது செய்யப்பட்ட பெண் வெல்லம்பிட்டி பொலிஸ் நிலையத்தில் ஒப்படைக்கப்பட்டுள்ளார்.
பின்னர் புதுக்கடை இலக்கம் 2 நீதவான் நீதிமன்றத்தில் முன்னிலைப்படுத்தப்பட்ட அவருக்கு எதிராகப் பெறப்பட்ட தடுப்புக் காவல் உத்தரவின் அடிப்படையில், வெல்லம்பிட்டி பொலிஸார் மேலதிக விசாரணைகளை முன்னெடுத்து வருகின்றனர்.
இந்தச் சம்பவம் தொடர்பான மேலதிக தகவல்கள் விசாரணைகளின் முடிவில் வெளியாகலாம் என எதிர்பார்க்கப்படுகிறது.
குறிப்பு: சந்தேகநபர் மீதான குற்றச்சாட்டுகள் நீதிமன்றத்தில் நிரூபிக்கப்படும் வரை அவர் குற்றவாளியாகக் கருதப்படமாட்டார்.
