மட்டக்களப்பு மாவட்டத்தில் நீண்டகாலமாகத் தீர்க்கப்படாமல் உள்ள மயிலத்தமடு–மாதவனை மேய்ச்சல் நிலப் பிரச்சினை தொடர்பில் கலந்துரையாடுவதற்காக, ஜனாதிபதி அநுர குமார திசாநாயக்கவுடன் சந்திப்பொன்றை நடத்துவதற்கு நேரம் ஒதுக்குமாறு கோரி இலங்கைத் தமிழரசுக் கட்சி கடிதம் அனுப்பியுள்ளது.
கட்சியின் பதில் தலைவர் சி.வி.கே. சிவஞானம், ஜனாதிபதிக்கு அனுப்பியுள்ள கடிதத்தில், மயிலத்தமடு–மாதவனை மேய்ச்சல் நிலங்களில் தொடர்ச்சியாக இடம்பெறுவதாகக் கூறப்படும் ஆக்கிரமிப்புகள் மற்றும் அப்பகுதிக்குச் செல்வதில் உள்ள சிரமங்கள் காரணமாகப் பால் பண்ணையாளர்களும் அவர்களது குடும்பத்தினரும் பெரிதும் பாதிக்கப்பட்டுள்ளதாகச் சுட்டிக்காட்டியுள்ளார்.
இந்தப் பிரச்சினைக்குத் தீர்வு காண்பதற்காக மாவட்ட மட்டத்திலும் நாடாளுமன்றத்தின் ஊடாகவும் பல்வேறு முயற்சிகள் முன்னெடுக்கப்பட்ட போதிலும், இதுவரை திருப்திகரமான தீர்வு எட்டப்படவில்லை எனவும் கடிதத்தில் குறிப்பிடப்பட்டுள்ளது.
இதனால், குறித்த விவகாரத்தில் ஜனாதிபதியின் நேரடித் தலையீடு அவசியம் எனத் தமிழரசுக் கட்சி வலியுறுத்தியுள்ளது.
மேலும், பிரச்சினைக்கு உடனடி நடவடிக்கைகளை முன்னெடுப்பது மற்றும் நீண்டகால நிலையான தீர்வை எட்டுவது தொடர்பில் கலந்துரையாடுவதற்காக, மட்டக்களப்பு மாவட்டத்தைப் பிரதிநிதித்துவப்படுத்தும் நாடாளுமன்ற உறுப்பினர்கள் உள்ளிட்ட தமிழரசுக் கட்சிப் பிரதிநிதிகளைச் சந்திப்பதற்கு விரைவில் நேரம் ஒதுக்குமாறும் கடிதத்தின் மூலம் கோரிக்கை விடுக்கப்பட்டுள்ளது.
