தாய்லாந்தின் புக்கெட் மாகாணத்தில் நிலவும் கடும் மழையைக் கருத்திற்கொண்டு, அந்நாட்டின் அனர்த்தத் தடுப்பு மற்றும் தணிப்புத் திணைக்களம் (DDPM) வெள்ள எச்சரிக்கையை விடுத்துள்ளது.
இன்று காலை வெளியிடப்பட்ட எச்சரிக்கையில், தாழ்நிலப் பகுதிகளில் வசிக்கும் மக்கள் அவதானத்துடன் இருக்குமாறு அறிவுறுத்தப்பட்டுள்ளனர்.
புக்கெட் மாகாணத்தில் அண்மையில் பெய்த கனமழை காரணமாக பல பகுதிகளில் வெள்ளப்பெருக்கு ஏற்பட்டதுடன், சில இடங்களில் மலைப்பகுதிகளில் இருந்து மண் மற்றும் பாறைகள் அடித்துவரப்பட்டு வீதிகளிலும் குடியிருப்புப் பகுதிகளிலும் குவிந்தன.
வெள்ளநீர் சில பகுதிகளில் வடிந்திருந்தாலும், மேலும் கனமழை பெய்யக்கூடும் என்பதால் திடீர் வெள்ளம் மற்றும் மண்சரிவு ஏற்படும் அபாயம் தொடர்வதாக அதிகாரிகள் எச்சரித்துள்ளனர்.
குறிப்பாக, தாழ்நிலப் பகுதிகள், நீர்நிலைகளுக்கு அருகிலுள்ள இடங்கள் மற்றும் மலை அடிவாரங்களில் வசிப்பவர்கள் கூடுதல் அவதானத்துடன் இருக்குமாறு கேட்டுக்கொள்ளப்பட்டுள்ளனர்.
முன்னெச்சரிக்கை நடவடிக்கையாக, பெறுமதியான பொருட்களை உயரமான பாதுகாப்பான இடங்களுக்கு மாற்றி வைக்குமாறும், வெள்ளநீர் தேங்கியுள்ள வீதிகளில் பயணிப்பதைத் தவிர்க்குமாறும் அறிவுறுத்தப்பட்டுள்ளது.
மேலும், மின்சார விபத்துகள் ஏற்படாமல் பாதுகாப்பு நடவடிக்கைகளை மேற்கொள்வதுடன், முதியவர்கள், சிறுவர்கள் மற்றும் உதவி தேவைப்படக்கூடியவர்களின் பாதுகாப்பிலும் கவனம் செலுத்துமாறு அதிகாரிகள் வலியுறுத்தியுள்ளனர்.
புக்கெட் மாகாணத்தில் வசிப்பவர்கள் மற்றும் அங்கு பயணம் மேற்கொள்ளும் சுற்றுலாப் பயணிகள், அதிகாரப்பூர்வ வானிலை அறிவிப்புகள் மற்றும் உள்ளூர் நிர்வாகத்தின் எச்சரிக்கைகளைத் தொடர்ந்து அவதானிக்குமாறு கேட்டுக்கொள்ளப்படுகின்றனர்.
