தற்போதைய இடதுசாரி அரசாங்கத்துக்கு மாற்றாக, சர்வதேசத் தொடர்புகளையும் அரசியல் அனுபவத்தையும் கொண்ட வலதுசாரி அரசாங்கமொன்றை அமைப்பதே தமது நோக்கம் என ஐக்கிய மக்கள் சக்தியின் நாடாளுமன்ற உறுப்பினர் எஸ்.எம். மரிக்கார் தெரிவித்துள்ளார்.
கொழும்பில் உள்ள தனியார் தொலைக்காட்சியொன்றுக்கு வழங்கிய விசேட நேர்காணலின்போதே அவர் இதனைக் குறிப்பிட்டுள்ளார்.
எதிர்காலத்தில் நடைபெறும் மாகாண சபை அல்லது நாடாளுமன்றத் தேர்தல்களில் ஐக்கிய மக்கள் சக்தியும் ஐக்கிய தேசியக் கட்சியும் ஒரே சின்னத்தின் கீழ் இணைந்து போட்டியிடவுள்ளதாக அவர் தெரிவித்துள்ளார்.
தற்போதைய அரசாங்கத்தை ஆட்சியிலிருந்து அகற்றுவது மட்டுமன்றி, நாட்டின் எதிர்காலத்தை மாற்றியமைப்பதும் இந்தக் கூட்டணியின் நோக்கம் என அவர் குறிப்பிட்டுள்ளார்.
10 பில்லியன் டொலர் முதலீட்டை ஈர்க்கத் திட்டம்
நாட்டின் பொருளாதார நெருக்கடிக்கு டொலர் பற்றாக்குறை முக்கிய காரணமாக இருப்பதாகக் குறிப்பிட்ட மரிக்கார், வெளிநாட்டு முதலீடுகளை ஈர்ப்பது, ஏற்றுமதி வருமானத்தை அதிகரிப்பது மற்றும் சுற்றுலாத்துறையை மேம்படுத்துவது அவசியம் எனத் தெரிவித்துள்ளார்.
புதிய அரசாங்கம் அமைக்கப்பட்ட முதல் ஆண்டிலேயே குறைந்தது 10 பில்லியன் அமெரிக்க டொலர் வெளிநாட்டு முதலீடுகளை நாட்டுக்குக் கொண்டுவர வேண்டும் என்றும் அவர் முன்மொழிந்துள்ளார்.
இதன் மூலம் டொலர் கையிருப்பை வலுப்படுத்தி, உழைக்கும் போது செலுத்தும் வரியை 11 முதல் 15 சதவீதம் வரையிலான மட்டத்திற்குக் குறைப்பதுடன், எரிபொருள், எரிவாயு மற்றும் மின்சாரக் கட்டணங்களையும் கணிசமாகக் குறைக்க முடியும் என அவர் தெரிவித்துள்ளார்.
இளைஞர்களின் ஆதரவைப் பெற எதிர்பார்ப்பு
எதிர்வரும் தேர்தல்களில் சுமார் 1.23 மில்லியன் புதிய இளம் வாக்காளர்களும், இரு கட்சிகளும் தனித்தனியாகச் செயல்பட்டதால் முன்னர் வாக்களிக்கச் செல்லாதிருந்ததாகக் கூறப்படும் சுமார் 1.5 மில்லியன் வாக்காளர்களும் தமது கூட்டணிக்கு ஆதரவளிப்பார்கள் என எதிர்பார்ப்பதாக மரிக்கார் குறிப்பிட்டுள்ளார்.
இளைஞர்களின் எதிர்பார்ப்புகளை நிறைவேற்றக்கூடிய நாட்டை உருவாக்குவது அவசியம் என்றும் அவர் வலியுறுத்தியுள்ளார்.
அரசாங்கத்தின் மீது அரசியல் பழிவாங்கல் குற்றச்சாட்டு
தற்போதைய அரசாங்கத்தின் காலத்திலும் இரகசிய அரசியல் ஒப்பந்தங்கள் இடம்பெறுவதாகக் குற்றஞ்சாட்டிய மரிக்கார், ஊழல் ஒழிப்பு நடவடிக்கைகள் அரசியல் பழிவாங்கலுக்குப் பயன்படுத்தப்படக்கூடாது எனத் தெரிவித்துள்ளார்.
ஊழல் குற்றச்சாட்டுகள் தொடர்பில் விசாரணைகள் நடத்தப்படுவதைத் தாம் எதிர்க்கவில்லை என்றும், அதேவேளை எதிர்க்கட்சியினர் மற்றும் ஸ்ரீலங்கா பொதுஜன பெரமுன உறுப்பினர்களுக்கு எதிராக அரசியல் அடக்குமுறைகள் முன்னெடுக்கப்படுவதை ஏற்றுக்கொள்ள முடியாது என்றும் அவர் குறிப்பிட்டுள்ளார்.
ஜனாதிபதி அடிக்கடி குறிப்பிடும் “எங்களை விடவும் சிறந்த ஒரு குழுவே அடுத்ததாக ஆட்சியைக் கைப்பற்றும்” என்ற கருத்து, ஐக்கிய மக்கள் சக்தி மற்றும் அதன் கூட்டணியைக் குறிப்பதாக இருக்கலாம் எனவும் மரிக்கார் தெரிவித்துள்ளார்.
