இலங்கையின் மீன்வளத்துறையில் களப்பணியாற்றும் அதிகாரிகளுக்கு 430 மின்சார மோட்டார் சைக்கிள்களை வழங்குவதற்கான புரிந்துணர்வு ஒப்பந்தத்தில் இந்தியாவும் இலங்கையும் கைச்சாத்திட்டுள்ளன.
குறித்த ஒப்பந்தத்தில் இலங்கைக்கான இந்திய உயர்ஸ்தானிகர் சந்தோஷ் ஜா மற்றும் மீன்வள, நீரியல்வள மற்றும் கடல் வளங்கள் அமைச்சின் செயலாளர் கலாநிதி பி.கே. கோலித கமல் ஜினதாச ஆகியோர் கையெழுத்திட்டனர். இந்த நிகழ்வு, அமைச்சர் ராமலிங்கம் சந்திரசேகர் முன்னிலையில் நடைபெற்றது.
இத்திட்டத்திற்காக இந்திய அரசாங்கம் 265 மில்லியன் இலங்கை ரூபாவை மானிய உதவியாக வழங்கவுள்ளது. இலங்கை அரசாங்கத்தின் கோரிக்கைக்கு அமைய இந்த உதவி வழங்கப்படுகிறது.
மீன்வள மற்றும் நீர்வளத் திணைக்களம், தேசிய நீர்வாழ் உயிரின வளர்ப்பு அபிவிருத்தி அதிகாரசபை (NAQDA), தேசிய நீர்வாழ் வளங்கள் ஆராய்ச்சி மற்றும் அபிவிருத்தி முகமை (NARA) உள்ளிட்ட நிறுவனங்களில் களப்பணியாற்றும் அதிகாரிகளுக்கு இந்த மின்சார மோட்டார் சைக்கிள்கள் வழங்கப்படவுள்ளன.
இதன் மூலம் அதிகாரிகளின் களப்பணித் திறன் மற்றும் செயற்பாட்டு வேகம் அதிகரிப்பதுடன், மீனவ சமூகங்களுடன் தொடர்ச்சியான தொடர்பைப் பேணவும், பொதுச் சேவைகளை விரைவாக முன்னெடுக்கவும் முடியும் என எதிர்பார்க்கப்படுகிறது.
மேலும், இந்தத் திட்டம் ஜனாதிபதி அநுரகுமார திசாநாயக்கவின் ‘தூய்மையான இலங்கை’ (Clean Sri Lanka) திட்டத்தின் சுற்றுச்சூழல் நிலைத்தன்மை இலக்குகளுக்கும் பங்களிக்கும் என தெரிவிக்கப்பட்டுள்ளது.
இலங்கையின் 25 மாவட்டங்களிலும் வீடமைப்பு, சுகாதாரம், கல்வி, மீன்வளம், போக்குவரத்து, புதுப்பிக்கத்தக்க எரிசக்தி மற்றும் விவசாயம் உள்ளிட்ட பல்வேறு துறைகளில் இந்தியாவின் அபிவிருத்தி ஒத்துழைப்புத் திட்டங்கள் தொடர்ந்து முன்னெடுக்கப்பட்டு வருகின்றன.
