மிரிஹான சிறப்பு குற்றப் புலனாய்வுப் பிரிவினரால் பாரிய வீட்டு மோசடி சம்பவம் தொடர்பில் இரு பெண்கள் கைது செய்யப்பட்டுள்ளனர்.
30 மற்றும் 31 வயதுடைய குறித்த இரு பெண்களும் கடந்த வியாழக்கிழமை கைது செய்யப்பட்டுள்ளனர்.
இலகு தவணைக் கட்டண முறையின் கீழ் வீடுகளை நிர்மாணித்துத் தருவதாக பொதுமக்களிடம் பணம் பெற்றுக்கொண்டு, வாக்குறுதியளித்த வீடுகளை நிர்மாணிக்காமல் மோசடி செய்ததாகக் கூறப்படும் தனியார் நிறுவனத்துக்கு உதவியதாகவும், உடந்தையாகச் செயற்பட்டதாகவும் பொலிஸார் தெரிவித்துள்ளனர்.
கைது செய்யப்பட்ட இருவரும் குறித்த நிறுவனத்தில் பிரதான விற்பனை முகாமையாளராகவும் செயற்பாட்டு அதிகாரியாகவும் பணியாற்றியுள்ளனர்.
குறித்த நிறுவனத்துக்கு எதிராக இதுவரை 245 முறைப்பாடுகள் கிடைத்துள்ளன. வீடுகளை நிர்மாணித்துத் தருவதாகக் கூறி பொதுமக்களிடமிருந்து பெருமளவு பணத்தை நிறுவனம் பெற்றுக்கொண்ட போதிலும், வாக்குறுதியளித்தபடி வீடுகளை நிர்மாணிக்கவில்லை என முறைப்பாடுகளில் தெரிவிக்கப்பட்டுள்ளது.
விசாரணைகளின்போது சந்தேகநபர்களுக்குச் சொந்தமான நான்கு கார்களையும் பொலிஸார் கைப்பற்றியுள்ளனர்.
இந்த வழக்கில் குறித்த நிறுவனத்தின் பணிப்பாளர் கடந்த ஜூலை 28ஆம் திகதி கைது செய்யப்பட்டிருந்ததுடன், அவர் எதிர்வரும் செப்டம்பர் 29ஆம் திகதி வரை விளக்கமறியலில் வைக்கப்பட்டுள்ளார்.
இந்நிலையில், கைது செய்யப்பட்ட இரு பெண்களும் நேற்று வெள்ளிக்கிழமை நுகேகொடை நீதவான் நீதிமன்றத்தில் முன்னிலைப்படுத்தப்பட்டனர். அவர்களை எதிர்வரும் செப்டம்பர் 29ஆம் திகதி வரை விளக்கமறியலில் வைக்க நீதிமன்றம் உத்தரவிட்டுள்ளது.
