வத்துகாமம் பகுதியில் பெரிய மரமொன்று பாதையின் குறுக்கே முறிந்து விழுந்ததில் போக்குவரத்து தடை

நாட்டில் தொடர்ச்சியாக பெய்துவரும் மழை காரணமாக மலையகத்தின் பல பகுதிகளில் ஆங்காங்கே சேதங்கள் ஏற்பட்டுள்ளன.

வத்துகாமம் – மடுல்கலை பிரதான வீதியில் “கெவும்போக்கு” என்று அழைக்கப்படும் வளைவுப் பகுதியில் பெரிய மரமொன்று பாதையின் குறுக்கே முறிந்து விழுந்ததில் போக்குவரத்து பாதிக்கப்பட்டது.

இதனால் மரம் விழுந்த இடத்தைத் தாண்டிச் செல்லும் கபரகலை, கலாபொக்க, மடுல்கலை, ஹுலுகங்கை, நக்கில்ஸ் மாவுஸா, பெத்தேகம, கந்தகெட்டிய, ஹுலுகங்கை, கோமரை மற்றும் பம்பரெல்ல உள்ளிட்ட பல பிரதேசங்களுக்கான போக்குவரத்து தடைப்பட்டுள்ளது.

அத்துடன் தேசிய நீர்வழங்கல் மற்றும் வடிகாலமைப்புச் சபையின் பிரதான நீர் விநியோகக் குழாய் சேதமடைந்து நீர் விநியோகமும் பாதிக்கப்பட்டுள்ளது.

அத்துடன், பன்விலை உட்பட பல பகுதிகளில் அடிக்கடி மின்சார விநியோகமும் தடைப்பட்டு வருகிறது. இதன் காரணமாக பிரதேச மக்கள் பல்வேறு அசௌகரியங்களுக்கு முகங்கொடுத்து வருகின்றனர்.