மாத்தறை, வல்கம பகுதியில் உள்ள வீடொன்றில் பொலிஸார் நடத்திய அதிரடிச் சோதனையில், 21 கிலோவுக்கும் அதிகமான ‘ஐஸ்’ போதைப்பொருளுடன் பெண் ஒருவர் உள்ளிட்ட இருவர் கைது செய்யப்பட்டுள்ளனர்.
ஹம்பாந்தோட்டை மாவட்ட குற்றத்தடுப்புப் பிரிவினருக்குக் கிடைத்த இரகசியத் தகவலின் அடிப்படையில் நேற்று (21) இந்தச் சோதனை நடவடிக்கை முன்னெடுக்கப்பட்டது. இதன் போது குறித்த வீட்டிலிருந்து 21 கிலோ 810 கிராம் ‘ஐஸ்’ போதைப்பொருள் கைப்பற்றப்பட்டதுடன், போதைப்பொருள் விற்பனை மூலம் ஈட்டப்பட்டதாகச் சந்தேகிக்கப்படும் 5 இலட்சம் ரூபாய் பணமும் பொலிஸாரால் மீட்கப்பட்டுள்ளது.
மேலும், சந்தேகநபர்களிடமிருந்து கார் ஒன்று, மோட்டார் சைக்கிள் ஒன்று மற்றும் 3 கைபேசிகளையும் பொலிஸார் பறிமுதல் செய்துள்ளனர்.
கைப்பற்றப்பட்ட போதைப்பொருளின் சந்தைப் பெறுமதி இதுவரை உத்தியோகபூர்வமாக மதிப்பிடப்படவில்லை எனத் தெரிவித்த பொலிஸ் ஊடகப் பேச்சாளர் உதவி பொலிஸ் அத்தியாட்சகர் எஃப்.யு. வூட்லர், கைது செய்யப்பட்ட இருவரையும் தடுப்புக் காவலில் வைத்து விசாரணைக்கு உட்படுத்துவதற்கான நீதிமன்ற உத்தரவைப் பெற நடவடிக்கை எடுக்கப்பட்டு வருவதாகவும் கூறினார்.
இச்சம்பவம் தொடர்பான மேலதிக விசாரணைகளை மாத்தறை மாவட்ட குற்றத்தடுப்புப் பிரிவினர் தீவிரமாக முன்னெடுத்து வருகின்றனர்.
