கல்கிஸ்ஸை நீதிவான் நீதிமன்றத்திற்குள் பிரபல பாதாள உலகத் தலைவர்களான ‘படோவிட்ட அஸங்க’ மற்றும் ‘கொஸ் மல்லி’ ஆகியோரின் சகாக்களுக்கிடையே மோதல் இடம்பெற்றுள்ளது.
குறித்த சம்பவத்தில் ‘படோவிட்ட அஸங்க’ குழுவைச் சேர்ந்த கருணாலுகே ஸ்ரீநாத் பிரியஷாந்த மற்றும் கொஸ் மல்லி குழுவைச் சேர்ந்த மதுஷ்க ரேணுக பெர்ணான்டோ ஆகிய இருவரும் நேற்று வியாழக்கிழமை (24) நீதிமன்ற கூண்டுக்கு அருகில் மோதிக் கொண்டுள்ளனர்.
கடந்த 2025 நவம்பர் மாதம் கல்கிஸ்ஸை சிறிபால வீதியில் நபர் ஒருவர் சுட்டுக் கொல்லப்பட்ட சம்பவத்தில் துப்பாக்கிதாரர்களுக்கு மோட்டார் சைக்கிள் ஓட்டுனராக செயற்பட்டவர் என்ற குற்றச்சாட்டின் பேரில் ஸ்ரீநாத் கைது செய்யப்பட்டுள்ள நிலையில் தெஹிவளை சிரிசங்கபோ வீதியில் உள்ள வீடொன்றின் மீது கைக்குண்டு தாக்குதல் மேற்கொண்டு இரண்டு சிறுவர்கள் படுகொலை செய்யப்பட்ட குற்றச்சாட்டின் பேரில் மதுஷ்க கைது செய்யப்பட்டிருந்தது குறிப்பிடத்தக்கது.
இந்த வழக்குகளின் நீதிமன்ற நடவடிக்கைகளுக்காக இரண்டு சந்தேகநபர்களும் கல்கிஸ்ஸை நீதிமன்றத்திற்கு அழைத்து வரப்பட்டிருந்தனர். இதன்போது ஸ்ரீநாத் நீதிமன்ற கூண்டுக்குள் இருந்த நிலையில் மதுஷ்க அடுத்த வழக்கு விசாரணைக்காக அருகில் அமரவைக்கப்பட்டிருந்தார்.
இதன்போது கூண்டிலிருந்து வெளியேறிய ஸ்ரீநாத் மதுஷ்கவை நோக்கிச் சென்று தாக்குதல் நடத்த முற்பட்டுள்ளார். உடனே சிறைச்சாலை மற்றும் பொலிஸ் அதிகாரிகள் தலையிட்டு நிலைமையைக் கட்டுப்பாட்டுக்குள் கொண்டு வந்தனர்.
இச்சம்பவத்தில் யாருக்கும் காயங்கள் ஏற்படவில்லை எனத் தெரிவித்த கல்கிஸ்ஸை பொலிஸார் மேலதிக விசாரணைகளை முன்னெடுத்துள்ளனர்.
இதனிடையே குறித்த இரண்டு சந்தேகநபர்களையும் தனித்தனியாக சிறைக்காவலில் வைக்குமாறு சிறைச்சாலை அதிகாரிகளுக்கு கல்கிஸ்ஸை மேலதிக நீதவான் ஹேமாலி ஹல்பந்தெனிய உத்தரவு பிறப்பித்துள்ளார்.
