களுத்துறை – வாதுவை பொதுபிட்டிய காலி வீதியில் இடம்பெற்ற விபத்தில் 21 வயதுடைய இளைஞர் ஒருவர் உயிரிழந்துள்ளார். அத்துடன், பாடசாலை மாணவி ஒருவர் படுகாயமடைந்து மருத்துவமனையில் அனுமதிக்கப்பட்டுள்ளார்.
களுத்துறையிலிருந்து வாதுவை நோக்கி ஒரே திசையில் பயணித்த இரண்டு மோட்டார் சைக்கிள்களின் கைப்பிடிகள் எதிர்பாராதவிதமாக ஒன்றுடன் ஒன்று உரசியதில் இந்த விபத்து நிகழ்ந்துள்ளது.
இதன்போது, ஒரு மோட்டார்சைக்கிள் வீதியில் சரிந்து வீழ்ந்துள்ளது.
மற்றைய மோட்டார்சைக்கிள் கட்டுப்பாட்டை இழந்து வீதியின் மறுபக்கத்திற்குச் சென்று, எதிரே வந்த கார் ஒன்றுடன் நேருக்கு நேர் மோதி விபத்துக்குள்ளானது.
விபத்தில் படுகாயமடைந்த இளைஞரும் பாடசாலை மாணவியும் பாணந்துறை ஆதார மருத்துவமனையில் அனுமதிக்கப்பட்ட போதிலும், சிகிச்சை பலனின்றி இளைஞர் உயிரிழந்துள்ளார்.
இந்த விபத்துடன் தொடர்புடைய மற்றைய மோட்டார்சைக்கிளின் சாரதி மற்றும் காரின் சாரதி ஆகிய இருவரையும் பொலிஸார் கைது செய்துள்ளனர்.
அவர்கள் இருவரையும் பாணந்துறை நீதவான் நீதிமன்றத்தில் முன்னிலைப்படுத்த பொலிஸார் நடவடிக்கைகள் மேற்கொண்டு வருகின்றனர்.
இந்தச் சம்பவம் தொடர்பான மேலதிக விசாரணைகளை வாதுவை பொலிஸார் முன்னெடுத்து வருகின்றனர்.
