அதிர்ஷ்டத்தை நம்பி லொத்தர் சீட்டுகளை கொள்வனவு செய்து வரும் இந்தியாவின் கேரளாவைச் சேர்ந்த 80 வயது விவசாயி ஒருவர், கடந்த 60 ஆண்டுகளில் சுமார் 2 கோடி இந்திய ரூபாய் வரை லொத்தர் சீட்டுகளுக்காக செலவிட்டுள்ளதாக இந்திய ஊடகங்கள் தெரிவிக்கின்றன.
இந்தியாவின், கேரளம் மாநிலம் கண்ணூர் மாவட்டத்தைச் சேர்ந்த பி.பி. ராகவன் (80) என்பவரே இவ்வாறு லொத்தர் சீட்டுகளை கொள்வனவு செய்து வருவதாக தெரிவிக்கப்படுகிறது.
1967ஆம் ஆண்டு முதல் லொத்தர் சீட்டுகளை கொள்வனவு செய்து வந்தபோதிலும், அவருக்கு திருப்திகரமான பரிசுகள் எதுவும் கிடைக்கவில்லை என தெரிவிக்கப்படுகிறது.
சில சந்தர்ப்பங்களில் ஆறுதல் பரிசுத் தொகைகள் கிடைத்ததாகவும் கூறப்படுகிறது.
எனினும், ஒருநாள் கோடிகளில் அதிர்ஷ்டம் கிடைத்து தனது வாழ்க்கை மாறும் என்ற நம்பிக்கையில் தொடர்ந்து லொத்தர் சீட்டுகளை கொள்வனவு செய்து வருவதாக அவர் தெரிவித்துள்ளார்.
லொத்தர் சீட்டுகளை கொள்வனவு செய்வதற்காக விவசாய நிலம் மற்றும் மனைவியின் நகைகள் உள்ளிட்டவற்றை இழந்ததாகவும், இதனால் கடன் சுமைக்கு ஆளானதாகவும் ராகவன் கூறியுள்ளார்.
இந்த நிலையில், இதுவரை தான் கொள்வனவு செய்த லொத்தர் சீட்டுகளில் பலவற்றை அவர் தனது வீட்டில் பாதுகாத்து வைத்துள்ளதாகவும், அவை ஐந்து மூடைகள் அளவுக்கு இருப்பதாகவும் தெரிவிக்கப்படுகிறது.
லொத்தர் சீட்டின் மீதான தனது ஆர்வத்தை ராகவன் இதுவரை கைவிடவில்லை எனவும் குறித்த தகவல்கள் தெரிவிக்கின்றன.
