கொழும்பு மாநகர சபையின் முன்னாள் உறுப்பினர் மஹிந்த கஹந்தகமவை எதிர்வரும் 26ஆம் திகதி வரை மீண்டும் விளக்கமறியலில் வைக்க நுகேகொடை நீதவான் நீதிமன்றம் உத்தரவிட்டுள்ளது
விசாரணையாளர்களால் தடுத்து வைக்கப்பட்டு விசாரணைக்கு உட்படுத்தப்பட்ட கஹந்தகம இன்று திங்கட்கிழமை (12) நீதிமன்றத்தில் ஆஜர்படுத்தப்பட்டதைத் தொடர்ந்து இந்த உத்தரவு பிறப்பிக்கப்பட்டுள்ளது.
ஐஸ் போதைப்பொருள் கடத்தலில் அவர் தொடர்புபட்டுள்ளதாக முன்வைக்கப்பட்டுள்ள குற்றச்சாட்டுகள் தொடர்பான விசாரணையின் அடிப்படையில், கடந்த 6 ஆம் திகதி மத்திய குற்றப் புலனாய்வுப் பணியகத்தினால் அவர் கைது செய்யப்பட்டார்.
கைது செய்யப்பட்ட சந்தர்ப்பத்தில் அவரிடமிருந்து ஐஸ் போதைப்பொருள் தொகையொன்றும் கைப்பற்றப்பட்டதாகக் கூறப்படுகிறது.
தொடர்ந்து முன்னெடுக்கப்பட்ட விசாரணைகளின்போது, ஒழுங்கமைக்கப்பட்ட போதைப்பொருள் கடத்தலுடன் தொடர்புடையவர்கள் எனச் சந்தேகிக்கப்படும் நபர்களுடன் கஹந்தகம துபாயில் நடைபெற்ற விருந்தொன்றில் கலந்துகொண்டதை வெளிப்படுத்தும் காணொளிக் காட்சிகள் கண்டறியப்பட்டுள்ளதாகவும் தெரிவிக்கப்படுகிறது.
