துருக்கியின் இஸ்தான்புல் நகரில் நேற்று 14ஆம் திகதி பெய்த கடும் மழையால் பாரிய வெள்ளப்பெருக்கு ஏற்பட்டுள்ளதுடன், நகரின் பல பகுதிகளில் போக்குவரத்தும் அன்றாடச் செயற்பாடுகளும் கடுமையாகப் பாதிக்கப்பட்டுள்ளன.
இஸ்தான்புல் ஆளுநர் அலுவலகத்தின் தகவலின்படி, மழை காரணமாக 1,277 வெள்ளச் சம்பவங்களும் 15 நிலச்சரிவுகளும் பதிவாகியுள்ளன. மேலும், வெள்ளநீரில் சிக்கிய 47 பேர் தொடர்பிலும் அவசர நடவடிக்கைகள் முன்னெடுக்கப்பட்டுள்ளன.
பல வீடுகள், வர்த்தக நிலையங்கள் பாதிப்பு
பெய்த கடும் மழையால் 808 வீடுகள், 280 வர்த்தக நிலையங்கள் மற்றும் 76 வாகனங்கள் பாதிக்கப்பட்டுள்ளதாகத் தெரிவிக்கப்பட்டுள்ளது. சில பகுதிகளில் மரங்கள் முறிந்து விழுந்ததுடன், கட்டடங்களின் கூரைகளும் சேதமடைந்துள்ளன.
பெய்கோஸ் மாவட்டத்தின் ஓமெர்லி பகுதியில் அதிகபட்சமாக சதுர மீட்டருக்கு 193.84 கிலோகிராம் மழைவீழ்ச்சி பதிவாகியுள்ளது. மேலும், பெய்கோஸ், சாரியர், எயுப்சுல்தான், அர்னாவுட்கோய் உள்ளிட்ட பல பகுதிகளிலும் அதிக மழைவீழ்ச்சி பதிவாகியுள்ளது.
வெள்ளநீர் வீதிகளில் பெருக்கெடுத்து ஓடியதால் சில இடங்களில் வீதிகள் சேதமடைந்துள்ளன. மருத்துவமனைகள், மெட்ரோ நிலையங்கள் மற்றும் பாடசாலைகளும் வெள்ளத்தால் பாதிக்கப்பட்டதாகச் செய்திகள் தெரிவிக்கின்றன.
மீட்புப் பணிகளில் ஆயிரக்கணக்கானோர்
நிலைமையைக் கட்டுப்படுத்தும் நோக்கில் அனர்த்த மற்றும் அவசரகால முகாமைத்துவ அமைப்பு (AFAD), இஸ்தான்புல் மாநகராட்சி மற்றும் மாவட்ட நிர்வாகங்கள் இணைந்து அவசர நடவடிக்கைகளை முன்னெடுத்துள்ளன.
சுமார் 8,000 பணியாளர்கள், 2,000 வாகனங்கள் மற்றும் கட்டுமான இயந்திரங்கள் மீட்பு மற்றும் சீரமைப்புப் பணிகளில் ஈடுபடுத்தப்பட்டுள்ளதாகத் தெரிவிக்கப்பட்டுள்ளது. வெள்ளநீர் தேங்கிய பகுதிகளில் நீரை அகற்றுதல், சேதமடைந்த வீதிகளைச் சீரமைத்தல் மற்றும் பொதுமக்களுக்கு உதவுதல் போன்ற பணிகள் முன்னெடுக்கப்பட்டுள்ளன.
போக்குவரத்து கடுமையாகப் பாதிப்பு
மாலை நேரத்தில் நகரின் போக்குவரத்து நெரிசல் சுமார் 90 சதவீதத்தை எட்டியதாகத் தகவல்கள் தெரிவிக்கின்றன. முக்கிய நெடுஞ்சாலைகள் மற்றும் பாலங்களில் வாகனங்கள் நீண்ட வரிசையில் காத்திருந்ததுடன், பொதுப் போக்குவரத்திலும் நெரிசல் ஏற்பட்டுள்ளது.
வெள்ளப்பெருக்கு காரணமாக T5 டிராம் சேவையும் குறிப்பிட்ட வழித்தடத்தில் மட்டுப்படுத்தப்பட்டதாகத் தெரிவிக்கப்பட்டுள்ளது.
பாடசாலைகளுக்கு விடுமுறை; இருசக்கர வாகனங்களுக்கும் கட்டுப்பாடு
மோசமான வானிலை காரணமாக ஒக்டோபர் 15ஆம் திகதி இஸ்தான்புல் மாகாணத்தில் நேரடி பாடசாலைக் கல்வி ஒரு நாளுக்கு இடைநிறுத்தப்பட்டுள்ளது.
மேலும், ஒக்டோபர் 14ஆம் திகதி இரவு 9 மணி முதல் மறு அறிவித்தல் வரை மோட்டார் சைக்கிள்கள் உள்ளிட்ட இருசக்கர வாகனங்களின் போக்குவரத்துக்கும் தடை விதிக்கப்பட்டுள்ளதாகச் செய்திகள் தெரிவிக்கின்றன.
மாற்றுத்திறனாளிகள், கர்ப்பிணிப் பெண்கள், போர் வீரர்கள் மற்றும் எட்டு வயதுக்குட்பட்ட குழந்தைகளின் தாய்மார்கள் உள்ளிட்ட சில அரச ஊழியர்களுக்கு நிர்வாக விடுமுறையும் வழங்கப்பட்டுள்ளது.
பொதுமக்களுக்கு எச்சரிக்கை
தொடர்ந்தும் கனமழை மற்றும் பலத்த காற்று வீசக்கூடிய சாத்தியம் இருப்பதால், அத்தியாவசியமற்ற பயணங்களைத் தவிர்த்து பாதுகாப்பான இடங்களில் இருக்குமாறு அதிகாரிகள் பொதுமக்களைக் கேட்டுக்கொண்டுள்ளனர்.
இஸ்தான்புலில் ஏற்பட்டுள்ள இந்த வெள்ளப்பெருக்கு, நகரின் போக்குவரத்து, வர்த்தகம் மற்றும் பொதுச் சேவைகளில் பெரும் பாதிப்பை ஏற்படுத்தியுள்ள நிலையில், நிலைமையைச் சீரமைக்கும் பணிகள் தொடர்ந்து முன்னெடுக்கப்பட்டு வருகின்றன.
