ஹோமாகம பொலிஸ் நிலையத்தில் தடுத்து வைக்கப்பட்டிருந்த 29 வயதுடைய இளைஞர் ஒருவர் உயிரிழந்த சம்பவம் தொடர்பில், பொலிஸார் தாக்குதல் நடத்தியதாக சமூகச் செயற்பாட்டாளர் வசந்த முதலிகே குற்றஞ்சாட்டியுள்ளார்.
கிரியவத்துடுவ பகுதியைச் சேர்ந்த இஷார ஹர்ஷ குமார என்ற இளைஞரே இவ்வாறு உயிரிழந்துள்ளார். போதைப்பொருள் தொடர்பான விசாரணையின்போது கடந்த 25ஆம் திகதி அவர் கைது செய்யப்பட்டதாகத் தெரிவிக்கப்படுகிறது.
பொலிஸ் நிலையத்தில் தடுத்து வைக்கப்பட்டிருந்தபோது இளைஞர் தாக்கப்பட்டதாகவும், உறவினர்கள் பலமுறை கோரிக்கை விடுத்தும் அவருக்கு மருத்துவ உதவி வழங்குவதில் தாமதம் ஏற்பட்டதாகவும் வசந்த முதலிகே குற்றஞ்சாட்டியுள்ளார்.
விசாரணையின் பின்னர் இளைஞரால் நடக்க முடியாத நிலை ஏற்பட்டதாகவும், அவரது உடலில் வெளிப்படையான காயங்கள் காணப்பட்டதுடன் வாயிலிருந்து இரத்தம் வெளியேறியதாகவும் உறவினர்கள் தெரிவித்துள்ளனர். இதையடுத்து, உறவினர்களின் கோரிக்கையைத் தொடர்ந்து அவர் ஹோமாகம ஆதார வைத்தியசாலைக்கு அழைத்துச் செல்லப்பட்டதாகவும், அங்கு கொண்டுசெல்லப்பட்டபோது அவர் உயிரிழந்திருந்ததாகவும் குடும்பத்தினர் கூறியுள்ளனர்.
இதற்கிடையில், குறித்த இளைஞருடன் மோட்டார் சைக்கிளில் பயணித்தபோது கைது செய்யப்பட்டதாகக் கூறப்படும் மற்றொரு இளைஞரின் நிலைமை குறித்தும் வசந்த முதலிகே கேள்வி எழுப்பியுள்ளார். அந்த நபர் எங்கிருக்கிறார் என்பது தொடர்பில் தகவல்கள் வெளியிடப்படவில்லை என்றும் அவர் குற்றஞ்சாட்டியுள்ளார்.
எனினும், இரண்டாவது நபர் காணாமல் ஆக்கப்பட்டதாக முன்வைக்கப்படும் குற்றச்சாட்டை பொலிஸ் பேச்சாளர் நிராகரித்துள்ளார். அந்தக் குற்றச்சாட்டு பொய்யானது எனத் தெரிவித்த அவர், பொலிஸ் காவலில் வைக்கப்படும் எந்தவொரு நபரும் நீதிமன்றத்தில் ஆஜர்ப்படுத்தப்பட வேண்டும் என்றும் குறிப்பிட்டுள்ளார்.
சட்டவிரோதமாகச் செயற்பட்டதாகக் கண்டறியப்படும் பொலிஸ் அதிகாரிகளுக்கு எதிராக, அவர்களின் பதவிநிலையைப் பொருட்படுத்தாமல் சட்ட நடவடிக்கை எடுக்கப்படும் என்றும் பொலிஸ் பேச்சாளர் தெரிவித்துள்ளார்.
மறுபுறம், காவலில் இருந்தபோது இளைஞருக்கு திடீர் உடல்நலக் குறைவு ஏற்பட்டதாகவும், வைத்தியசாலையில் அனுமதிக்கப்பட்ட பின்னர் அவர் உயிரிழந்ததாகவும் பொலிஸார் தெரிவித்துள்ளனர்.
இந்தச் சம்பவம் தொடர்பான ஆரம்பகட்ட விசாரணைகள் ஹோமாகம உதவி பொலிஸ் அத்தியட்சகரின் தலைமையில் ஆரம்பிக்கப்பட்டுள்ளன. இளைஞரின் மரணத்திற்கான காரணத்தைக் கண்டறிவதற்கான நீதவான் விசாரணையும் பிரேத பரிசோதனையும் இன்று 26ஆம் திகதி நடைபெறவுள்ளதாகத் தெரிவிக்கப்பட்டுள்ளது.
இந்நிலையில், இளைஞரின் மரணம் தொடர்பில் பக்கச்சார்பற்ற விசாரணை நடத்தப்பட்டு, சம்பவத்திற்குப் பொறுப்பானவர்கள் அடையாளம் காணப்பட்டு உரிய நடவடிக்கை எடுக்கப்பட வேண்டும் என உறவினர்களும் பிரதேச மக்களும் கோரிக்கை விடுத்துள்ளனர்.
