வங்காள விரிகுடாவில் உருவான தாழமுக்கம் காரணமாக இலங்கையின் பல பகுதிகளில் கனமழை பெய்து வருவதுடன், வெள்ளப்பெருக்கு மற்றும் இயற்கை அனர்த்தங்களால் உயிரிழப்புகளும் சொத்துச் சேதங்களும் ஏற்பட்டுள்ளன.
அனர்த்த முகாமைத்துவ நிலையத்தின் தகவலின்படி, இதுவரை 12 பேர் உயிரிழந்துள்ளதுடன், ஒருவர் காணாமல் போயுள்ளார். மேலும் 25 பேர் காயமடைந்துள்ளனர்.
கடந்த 24 மணிநேரத்தில் புத்தளம் மாவட்டத்தின் கரந்திப்பவல் பகுதியில் அதிகபட்சமாக 195.7 மில்லிமீட்டர் மழை பதிவாகியுள்ளது. கேகாலை, யாழ்ப்பாணம், மன்னார் மற்றும் கிளிநொச்சி உள்ளிட்ட மாவட்டங்களிலும் கனமழை பெய்துள்ளது.
நாட்டின் 21 மாவட்டங்களைச் சேர்ந்த 206 பிரதேச செயலகப் பிரிவுகளில் 2,826 குடும்பங்களைச் சேர்ந்த 10,311 பேர் பாதிக்கப்பட்டுள்ளனர். மேலும், 28 வீடுகள் முழுமையாகவும் 1,807 வீடுகள் பகுதியளவிலும் சேதமடைந்துள்ளன. பாதிக்கப்பட்ட 23 குடும்பங்களைச் சேர்ந்த 67 பேர் மூன்று பாதுகாப்பு முகாம்களில் தங்க வைக்கப்பட்டுள்ளனர்.
பல பகுதிகளில் வெள்ள அபாயம்
மாதம்பை–மெல்லவாகார வீதியில் அமைந்துள்ள களு அத்துர வான்கதவு பகுதியில் ஏற்பட்ட வெள்ளப்பெருக்கில் சிக்கி ஒருவர் அடித்துச் செல்லப்பட்டுள்ளதாகத் தெரிவிக்கப்படுகிறது.
தொடர்ச்சியான மழையால் களு கங்கை மற்றும் மகாவலி கங்கையின் நீர்மட்டம் உயர்ந்துள்ளது. இதனால் இரத்தினபுரி மற்றும் நாவலப்பிட்டியின் தாழ்நிலப் பகுதிகளில் வெள்ளப்பெருக்கு ஏற்பட்டுள்ளது. இரத்தினபுரியில் களு கங்கையின் நீர்மட்டம் ஏழு அடியைத் தாண்டியதால் சில தாழ்நிலப் பகுதிகளும் வீதிகளும் நீரில் மூழ்கியுள்ளன.
அதேவேளை, களனி கங்கை மற்றும் அத்தனகலு ஓயாவின் நீர்மட்டம் உயர்ந்து வருவதால் கம்பஹா மாவட்டத்தின் தாழ்நிலப் பகுதிகளுக்கும் வெள்ள அபாயம் ஏற்பட்டுள்ளது.
இரத்தினபுரி–பாணந்துறை A8 பிரதான வீதியில் மரங்கள் முறிந்து விழுந்ததால் போக்குவரத்துத் தடை ஏற்பட்டது. பின்னர் பொலிஸார் மற்றும் பிரதேசவாசிகளின் உதவியுடன் வீதி சீரமைக்கப்பட்டது.
பல நீர்த்தேக்கங்களின் வான்கதவுகள் திறப்பு
தொடர்ச்சியான மழையால் நீர்மட்டம் உயர்ந்துள்ள நிலையில், நீர்ப்பாசனத் திணைக்களத்திற்குச் சொந்தமான 14 பிரதான நீர்த்தேக்கங்களில் நீர் வான்பாய்ந்து வருவதாகத் தெரிவிக்கப்பட்டுள்ளது.
குகுலே கங்கை, பொல்கொல்ல, விமலசுரேந்திர, லக்ஷபான, மேல் கொத்மலை, தம்புள்ளை இப்பன்கட்டுவ, கலா வாவி, தெதுரு ஓயா, நோர்ட்டன் கேனியன் மற்றும் இராஜாங்கனை உள்ளிட்ட நீர்த்தேக்கங்களின் வான்கதவுகள் திறக்கப்பட்டுள்ளன.
தம்புள்ளை ஓயா நீர்த்தேக்கத்தின் வான்கதவு திறக்கப்பட்டு விநாடிக்கு 1,000 கன அடி நீர் வெளியேற்றப்பட்டு வருகிறது. கலா வாவியின் இரண்டு அவசர வான்கதவுகளும் ஆறு அங்குல உயரத்திற்குத் திறக்கப்பட்டுள்ளன.
இராஜாங்கனை நீர்த்தேக்கத்தின் எட்டு வான்கதவுகள் திறக்கப்பட்டுள்ளதுடன், அவற்றில் ஆறு கதவுகள் ஊடாக விநாடிக்கு 3,827 கன அடி நீர் வெளியேற்றப்படுவதாகத் தெரிவிக்கப்பட்டுள்ளது.
விக்டோரியா நீர்த்தேக்கம் அதன் அதிகபட்சக் கொள்ளளவை எட்டியுள்ளதால் வான்கதவுகள் திறக்கப்பட்டு நீர் வெளியேற்றப்படவுள்ளது. காசல்ரீ நீர்த்தேக்கமும் வான்பாயும் மட்டத்தை எட்டியுள்ளது.
பொதுமக்களுக்கு அவதான எச்சரிக்கை
ஆறுகள் மற்றும் நீர்த்தேக்கங்களைச் சூழவுள்ள தாழ்நிலப் பகுதிகளில் வசிப்போர் மிகுந்த அவதானத்துடன் இருக்குமாறு கேட்டுக்கொள்ளப்பட்டுள்ளனர்.
வெள்ளப்பெருக்கு அல்லது ஏனைய அவசர அனர்த்த நிலைமைகள் ஏற்பட்டால், உடனடியாக அனர்த்த முகாமைத்துவ நிலையத்தின் 117 என்ற அவசர தொலைபேசி இலக்கத்திற்குத் தொடர்புகொள்ளுமாறு பொதுமக்களுக்கு அறிவுறுத்தப்பட்டுள்ளது.
தொடர்ச்சியான மழை காரணமாக வெள்ள அபாயம் அதிகரிக்கக்கூடும் என்பதால், அதிகாரிகளின் அறிவுறுத்தல்களைப் பின்பற்றி பாதுகாப்பு நடவடிக்கைகளை மேற்கொள்வது அவசியமாகும்.
