நாட்டில் இடம்பெற்ற பல கொலைகள் மற்றும் குற்றச் செயல்களுடன் தொடர்புடைய பிரதான ஒழுங்கமைக்கப்பட்ட குற்றவாளியான ‘ஊரகஹ இந்திக’ எனப்படும் இந்திக சம்பத், டுபாயில் வைத்து அந்நாட்டு பாதுகாப்புப் பிரிவினரால் கைது செய்யப்பட்டுள்ளார்.
இது தொடர்பில் இதுவரை உத்தியோகபூர்வ அறிவிப்புகள் எதுவும் வெளியாகாத நிலையில், கைது செய்யப்பட்டுள்ள குறித்த குற்றவாளியை விரைவில் இலங்கைக்கு அழைத்து வருவதற்கான நடவடிக்கைகளை இலங்கை பாதுகாப்புப் பிரிவினர் முன்னெடுத்து வருவதாகத் தெரிவிக்கப்படுகிறது.
கடந்த 2024 ஆம் ஆண்டு பெப்ரவரி மாதம் 26 ஆம் திகதி கரந்தெனிய பகுதியில் இலங்கை பொதுச் சுகாதார பரிசோதகர்கள் சங்கத்தின் பொருளாளர் ரோஷன் குமார சுட்டுக்கொல்லப்பட்ட சம்பவத்தின் பிரதான திட்டமிடலுடன் ‘ஊரகஹ இந்திக’ தொடர்புடையவர் என ஏற்கனவே கண்டறியப்பட்டிருந்தது.
குறித்த கொலைச் சம்பவத்துடன் தொடர்புடைய பிரதான துப்பாக்கிதாரி சில மாதங்களுக்குப் பின்னர் கல்கிஸ்ஸை பகுதியில் கைது செய்யப்பட்டிருந்தார்.
பொலிஸார் மேற்கொண்ட விசாரணைகளின்போது, வெளிநாட்டில் வசித்து வந்த ‘ஊரகஹ இந்திக’ என்பவரால் இந்த கொலைக்கான ஒப்பந்தம் வழங்கப்பட்டமை தெரியவந்துள்ளதாக தெரிவிக்கப்படுகிறது.
