வெளிவிவகார அமைச்சர் விஜித்த ஹேரத் மற்றும் நியூஸிலாந்தின் வர்த்தகம் மற்றும் முதலீட்டு அமைச்சர் டாட் மெக்லே ஆகியோருக்கு இடையிலான சந்திப்பின்போது இருநாடுகளுக்கும் இடையிலான வர்த்தக முதலீட்டுக் கட்டமைப்பு ஒப்பந்தம் மற்றும் வர்த்தகத்தை விரிவுபடுத்துதல் என்பன தொடர்பில் விரிவாகக் கலந்துரையாடப்பட்டது.
வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித்த ஹேரத் இம்மாதம் 26 ஆம் திகதி முதல் எதிர்வரும் ஜுன் 3 ஆம் திகதி வரை நியூஸிலாந்து மற்றும் அவுஸ்திரேலியா ஆகிய நாடுகளுக்கு உத்தியோகபூர்வ விஜயமொன்றை மேற்கொண்டிருக்கிறார்.
அதன்படி கடந்த செவ்வாய்க்கிழமை (26) நியூஸிலாந்தை சென்றடைந்த அமைச்சர் விஜித்த ஹேரத், அங்கு உயர்மட்டப் பிரதிநிதிகள் பலருடனும் சந்திப்புக்களை முன்னெடுத்துள்ளார்.
அதற்கமைய நியூஸிலாந்தின் வர்த்தகம் மற்றும் முதலீட்டு அமைச்சர் டாட் மெக்லே சந்திப்பின்போது இருநாடுகளுக்கும் இடையிலான வர்த்தக முதலீட்டுக் கட்டமைப்பு ஒப்பந்தம் மற்றும் வர்த்தகத்தை விரிவுபடுத்துதல் உட்பட பரஸ்பர நலன் மற்றும் ஒத்துழைப்பு தொடர்பில் கலந்துரையாடினார்.
அதனைத்தொடர்ந்து நியூஸிலாந்தின் வர்த்தகம் மற்றும் முதலீட்டுக்கான இராஜாங்க அமைச்சர் நிக்கோலா கிரிக்கை சந்தித்த விஜித்த ஹேரத், வர்த்தக ஒத்துழைப்பு, சுற்றுலா மற்றும் உலகப் பொருளாதாரம் என்பன உள்ளடங்கலாக இருநாடுகளினதும் பரஸ்பர அக்கறைக்குரிய விடயங்கள் தொடர்பில் கலந்துரையாடினார்.
அத்தோடு இலங்கையின் பொருளாதார வளர்ச்சி குறித்து அந்நாட்டு அமைச்சருக்கு விளக்கமளித்ததுடன், இலங்கையில் முதலீடுகளை மேற்கொள்ளுமாறு நியூஸிலாந்து வர்த்தகர்களுக்கு அழைப்புவிடுத்தார்.Beaches & Islands
அதேபோன்று இலங்கை மாணவர்களுக்கான புலமைப்பரிசில்கள், தொழிற்பயிற்சிக்கான திறன் மேம்பாடு மற்றும் கல்வித்துறைசார் வாய்ப்புக்கள் தொடர்பில் நியூஸிலாந்தின் உயர்கல்வி அமைச்சர் பென்னி சிம்மண்ட்ஸ் மற்றும் வெளிவிவகார அமைச்சர் விஜித்த ஹேரத் ஆகியோருக்கு இடையிலான சந்திப்பின்போது ஆராயப்பட்டது.
