அமெரிக்க அதிபர் டொனால்ட் டிரம்ப், அமெரிக்க நிறுவனங்களை இலக்காகக் கொண்ட டிஜிட்டல் சேவைகள் வரி (Digital Services Tax) விதிக்கும் எந்த நாட்டுக்கும், 100% வரி விதிக்கப்படும் என எச்சரிக்கை விடுத்துள்ளார்.
தனது Truth Social தளத்தில் பதிவிட்டுள்ள அவர், பல ஐரோப்பிய நாடுகள் அமெரிக்க நிறுவனங்களை குறிவைக்கும் டிஜிட்டல் சேவைகள் வரியை விரைவில் அமல்படுத்துவது குறித்து விவாதித்து வருவதாகவும், சில நாடுகள் அதனை நடைமுறைப்படுத்துவதற்கு மிக அருகில் இருப்பதாகவும் தெரிவித்துள்ளார்.
இவ்வாறான வரியை விதிக்கும் எந்த நாடும் உடனடியாக அமெரிக்காவுக்கு ஏற்றுமதி செய்யும் அனைத்து பொருட்களுக்கும் 100% இறக்குமதி வரியை சந்திக்க நேரிடும் என அவர் கடுமையாக எச்சரித்துள்ளார்.
மேலும், அந்த நாட்டுடன் உள்ள தற்போதைய அல்லது எதிர்கால வர்த்தக ஒப்பந்தங்களை மீறியும் இந்த வரி விதிப்பு அமலுக்கு வரும் என்றும், வரி நடைமுறைப்படுத்தப்பட்ட உடனே இது செயல்படுத்தப்படும் என்றும் டிரம்ப் கூறியுள்ளார்.
அமெரிக்க பெரிய தொழில்நுட்ப நிறுவனங்களை அதிகமாக இலக்காகக் கொண்டு சில நாடுகள் விதித்துள்ள அல்லது முன்மொழிந்துள்ள டிஜிட்டல் சேவைகள் வரிக்கு அமெரிக்கா தொடர்ந்து எதிர்ப்பு தெரிவித்து வருவதையே இந்த எச்சரிக்கை பிரதிபலிக்கிறது என கூறப்படுகிறது.
இதற்கிடையில், இலங்கை அரசு ஜூலை 1 முதல் வெளிநாட்டு நிறுவனங்கள் வழங்கும் டிஜிட்டல் சேவைகளுக்கு 18% மதிப்பு கூட்டு வரி (VAT) விதிக்க திட்டமிட்டுள்ளது. இருப்பினும், இது டிரம்ப் குறிப்பிட்டுள்ள டிஜிட்டல் சேவைகள் வரியைப் போல அமெரிக்க தொழில்நுட்ப நிறுவனங்களின் வருவாயை நேரடியாக இலக்காகக் கொண்ட தனிப்பட்ட வரி அல்ல; மாறாக, உள்ளூரில் பயன்படுத்தப்படும் வெளிநாட்டு டிஜிட்டல் சேவைகளுக்கு விதிக்கப்படும் VAT ஆகும்.
