கொழும்பில் நடைபெற்று வரும் இந்திய அணிக்கு எதிரான இரண்டாவது டெஸ்ட் போட்டியின் இரண்டாவது இன்னிங்ஸில், இலங்கையின் இளம் வீரர் சொனல் தினுச அபார சதம் விளாசி அணியை இன்னிங்ஸ் தோல்வியிலிருந்து காப்பாற்றியுள்ளார்.
மிகுந்த நெருக்கடிக்கு மத்தியில் பொறுப்பான ஆட்டத்தை வெளிப்படுத்திய அவர், இலங்கை அணியைப் போட்டியில் வலுவான நிலைக்கு அழைத்துச் சென்றுள்ளார்.
இப்போட்டியில் முதல் இன்னிங்ஸில் இந்திய அணி 9 விக்கெட் இழப்பிற்கு 503 ஓட்டங்கள் எடுத்து ஆட்டத்தை இடைநிறுத்தியது.
பதிலுக்கு முதல் இன்னிங்ஸை விளையாடிய இலங்கை அணி 290 ஓட்டங்களுக்கு ஆட்டமிழந்ததால், ‘ஃபாலோ-ஆன்’ பெற வேண்டிய கட்டாயத்திற்குத் தள்ளப்பட்டது. தொடர்ந்து 213 ஓட்டங்கள் பின்தங்கிய நிலையில் இலங்கை அணி தனது இரண்டாவது இன்னிங்ஸைத் தொடங்கியது.
இரண்டாவது இன்னிங்ஸிலும் இலங்கை அணியின் முன்வரிசை விக்கெட்டுகள் அடுத்தடுத்து சரிந்த போது, அணியை மீட்கும் பொறுப்பைச் சொனல் தினுச ஏற்றுக்கொண்டார்.
களத்தில் மிகுந்த அழுத்தத்திற்கு இடையே நிதானமாகப் போராடிய அவர், 208 பந்துகளை எதிர்கொண்டு 6 பவுண்டரிகளுடன் 101 ஓட்டங்கள் எடுத்து ஆட்டமிழக்காமல் களத்தில் உள்ளார்.
ஏற்கெனவே இப்போட்டியின் முதல் இன்னிங்ஸிலும் 103 ஓட்டங்கள் குவித்துச் சதம் அடித்திருந்த தினுச, தற்போது இரண்டாவது இன்னிங்ஸிலும் சதம் விளாசித் தனது அபாரமான ஆட்டத் திறனை நிரூபித்துள்ளார்.
அணியின் இக்கட்டான சூழ்நிலையில் ஒரே போட்டியில் இரண்டு இன்னிங்ஸ்களிலும் சதம் அடித்து இலங்கை அணியின் நம்பிக்கை நட்சத்திரமாக அவர் பிரகாசித்துள்ளார்.
இலங்கை அணி சரிவைச் சந்தித்த போது கீழ்வரிசை வீரரான கேசர நுவந்தவுடன் இணைந்த தினுச, 7-வது விக்கெட்டுக்கு 112 ஓட்டங்கள் சேர்த்துப் பாரிய திருப்புமுனையை ஏற்படுத்தினார்.
நுவந்த தனது பங்கிற்கு 46 ஓட்டங்கள் எடுத்து தினுசவிற்குச் சிறந்த ஒத்துழைப்பு வழங்கி அணியின் ஓட்ட எண்ணிக்கையை உயர்த்தினார்.
தற்போது 136 ஓவர்கள் முடிவில் இலங்கை அணி தனது இரண்டாவது இன்னிங்ஸில் 8 விக்கெட் இழப்பிற்கு 387 ஓட்டங்கள் எடுத்துள்ளது.
தினுசவின் இந்த சாமர்த்தியமான சதத்தின் மூலம் இலங்கை அணி தற்போது 174 ஓட்டங்கள் முன்னிலை பெற்றுப் போட்டியை டிராவை நோக்கி வெற்றிகரமாக நகர்த்தி வருகிறது.
