இலங்கையின் பொருளாதார வளர்ச்சிக்குத் தேவையான தொழில் மற்றும் தொழில்நுட்ப மேம்பாட்டுக்காக அனைத்து சந்தர்ப்பங்களிலும் கைகொடுக்க சீனா தயாராக இருப்பதாக இலங்கைக்கான சீனத் தூதுவர் வெய் ஹுவாஷியாங் தெரிவித்தார்.
கண்டி, பல்லேகலையில் அமைந்துள்ள கெலுன் லைஃப்சயின்சஸ் மற்றும் செலோஜென் நிறுவனங்களுக்குக் கள விஜயம் ஒன்றை மேற்கொண்டபின் ஊடகங்களுக்கு அவர் இனைத் தெரிவித்தார்.
அவர் மேலும் கூறுகையில்,
இலங்கையின் பொருளாதார வளர்ச்சிக்குத் தேவையான தொழில் மற்றும் தொழில்நுட்ப மேம்பாட்டுக்காக அனைத்து சந்தர்ப்பங்களிலும் கைகொடுக்க சீனா தயாராக இருக்கிறது. சீனா எப்போதும் இலங்கையின் வளர்ச்சியை விரும்பும் ஒரு நாடு என்பதால், அந்த வளர்ச்சிக்காகக் கல்வி மற்றும் நவீன தொழில்நுட்பத்தை வழங்க நடவடிக்கை எடுக்கப்படும்.
இலங்கையில் இயங்கி வரும் இதுபோன்ற நிறுவனங்கள் மூலம் பெருமளவிலான மக்கள் பயனடைவதால், இத்தகைய தொழில்களை விரிவுபடுத்தி மேலும் வளர்ச்சி பெறச் செய்ய சீனா ஆதரவளிக்கும்.
அத்துடன் இதுபோன்ற முதலீடுகளை ஊக்குவிக்க இலங்கை அரசு எடுக்கும் முயற்சிகளை சீன அரசு பாராட்டுவதாகவும் அவர் மேலும் தெரிவித்தார்.
இதேவேளை, சீனா, இந்தியா மற்றும் இலங்கை கூட்டுப் பங்களிப்புடன் பல்லேகலை முதலீட்டு வலயத்தில் அமைந்துள்ள நாட்டின் முன்னணி சேலைன் உற்பத்தி நிறுவனங்களான கெலுன் லைஃப்சயின்சஸ் மற்றும் செலோஜென் ஆகிய நிறுவனங்கள், இலங்கையில் உள்ள வைத்திய நிலையங்களுக்கு “சேலைன்” மருந்துகளை வழங்கும் இரண்டு முக்கிய நிறுவனங்களாகும். இந்த நிறுவனங்களுக்கே சீனத் தூதுவர் விஜயம் மேற்கொண்டார்.
