கிங் கங்கையின் வான்பாய்தல் காரணமாக காலி மாவட்டத்தின் மாபலகம பகுதி வெள்ளத்தில் மூழ்கியுள்ள நிலையில், அப்பகுதியில் பாதிக்கப்பட்ட மக்களை பாதுகாப்பாக அழைத்துச் செல்வதற்கான நடவடிக்கைகளில் கடற்படையினர் ஈடுபட்டுள்ளனர்.
இதற்கமைய, இன்று (25) மாபலகம பகுதிக்கு அனுப்பப்பட்ட கடற்படை இடர் நிவாரணக் குழுவினர், வெள்ளத்தால் பாதிக்கப்பட்ட மக்களின் பாதுகாப்பான போக்குவரத்துக்கு தேவையான உதவிகளை வழங்கினர்.
சீரற்ற காலநிலையால் பாதிக்கப்பட்ட மக்களுக்கு நிவாரணம் வழங்குவதற்காக தென் மாகாணத்தின் தவலம, ஹினிதும, மாபலகம, தொடங்கொட, உடுகம, நாகொட மற்றும் ஹபரகொட ஆகிய பகுதிகளில் ஏழு கடற்படை இடர் நிவாரணக் குழுக்கள் ஈடுபடுத்தப்பட்டுள்ளன.
கிங் கங்கையின் வான்பாய்தல் காரணமாக ஏற்பட்டுள்ள சிறியளவிலான வெள்ளப்பெருக்கால் பாதிக்கப்பட்ட மக்களின் அன்றாட நடவடிக்கைகளுக்குத் தேவையான பாதுகாப்பான போக்குவரத்து வசதிகளையும் கடற்படையினர் வழங்கி வருகின்றனர்.
