இலங்கையில் சட்டவிரோத இணைய சூதாட்டத்தில் ஈடுபட்ட 8 வெளிநாட்டவர்கள் இலங்கை பொலிசாரினால் இன்று (06) கைதுசெய்யப்பட்டுள்ளனர்.
தலவத்துகொட பகுதியில் உள்ள வீடொன்றில் தங்கியிருந்த சிலர் கணினிகள் மற்றும் கையடக்கத் தொலைபேசிகளைப் பயன்படுத்தி இணையவழி சூதாட்ட நடவடிக்கையை முன்னெடுத்து வருவதாக கிடைத்த இரகசிய தகவலின் அடிப்படையில், தலங்கம பொலிஸாரினால் இந்த சுற்றிவளைப்பு மேற்கொள்ளப்பட்டுள்ளது.
கடுவலை நீதவான் நீதிமன்றத்திடம் பெறப்பட்ட தேடுதல் உத்தரவின் அடிப்படையில் இந்த சோதனை நடவடிக்கை முன்னெடுக்கப்பட்டுள்ளது.
இதன்போது, குற்றப் பதிவுப் பிரிவு, குற்றப் புலனாய்வுத் திணைக்களத்தின் கணினி குற்றப்பிரிவு மற்றும் பொலிஸ் சுற்றுலாப் பிரிவு அதிகாரிகள் இணைந்து குறித்த வீட்டை சோதனையிட்டுள்ளனர்.
இதன்போது, வீட்டில் தங்கியிருந்த 22 முதல் 51 வயதுக்குட்பட்ட 8 இந்திய பிரஜைகள் கைது செய்யப்பட்டுள்ளனர்.
மேலும், அவர்களிடமிருந்து 6 கணினிகள், 39 கையடக்கத் தொலைபேசிகள் உள்ளிட்ட பல்வேறு மின்னணு சாதனங்களும் பொலிஸாரினால் கைப்பற்றப்பட்டுள்ளது.
சம்பவம் தொடர்பில் தலங்கம பொலிஸார் மேலதிக விசாரணைகளை மேற்கொண்டு வருகின்றனர்.
