சமூக ஊடகங்களில் வெளியிடப்படும் வெளிநாட்டு பல்கலைக்கழக அனுமதி விளம்பரங்களை நம்பி, இலட்சக்கணக்கான ரூபாயை இழந்துள்ளதாகப் பெற்றோர்களும் மாணவர்களும் முறைப்பாடு செய்துள்ளதாக இலங்கை கணினி அவசர தயார்நிலை குழு (CERT) தெரிவித்துள்ளது.
வெளிநாட்டு பல்கலைக்கழகங்களில் சேர்க்கை பெற்றுத் தருவதாகவும், விசா, வேலை அனுமதி மற்றும் எதிர்காலத்தில் குடியுரிமை பெற்றுக்கொள்ள உதவுவதாகவும் கூறி மோசடியாளர்கள் மக்களை ஏமாற்றுவதாக CERT எச்சரித்துள்ளது.
மேலும், போலியான பல்கலைக்கழக ஆவணங்கள், திருடப்பட்ட காணொளிகள் மற்றும் புகைப்படங்களைப் பயன்படுத்தி நம்பிக்கையை ஏற்படுத்தும் மோசடியாளர்கள், பதிவு மற்றும் ஆரம்பக் கல்விக் கட்டணங்களைப் பெற்ற பின்னர் தொடர்புகளைத் துண்டித்துவிடுவதாகவும் தெரிவிக்கப்பட்டுள்ளது.
எனவே, வெளிநாட்டுப் பல்கலைக்கழகங்களில் சேர்வதற்கு முன்பு அவற்றின் அங்கீகாரம், வழங்கப்படும் ஆவணங்கள் மற்றும் வங்கிக் கணக்கு விபரங்களைச் சரிபார்த்த பின்னரே பணம் செலுத்துமாறு CERT பொதுமக்களைக் கேட்டுக்கொண்டுள்ளது.
