இலங்கையில் 20 இலட்சத்திற்கும் அதிகமானோர் நுண்நிதிக் கடன் பொறியில் சிக்கியுள்ளதாகவும், அவர்களை மீட்டெடுக்க அரசாங்கம் விரைவான நிவாரணத் திட்டமொன்றை நடைமுறைப்படுத்த வேண்டும் என்றும் எதிர்க்கட்சித் தலைவர் சஜித் பிரேமதாச தெரிவித்துள்ளார்.
நுண்நிதிக் கடன்களால் பாதிக்கப்பட்ட மக்களுக்கு நியாயம் வழங்கும் வேலைத்திட்டம் தொடர்பாக நாடாளுமன்றத்தில் சமிந்த விஜேசிறி எம்.பி. முன்வைத்த தனிநபர் பிரேரணை மீதான விவாதத்தில் கலந்துகொண்டு உரையாற்றும்போதே அவர் இதனைக் குறிப்பிட்டார்.
நுண்நிதிக் கடன் திட்டங்கள் ஆரம்பத்தில் வறுமையை ஒழிக்கும் நோக்கத்துடன் அறிமுகப்படுத்தப்பட்ட போதிலும், பின்னர் அதிக வட்டி அறவிடும் வணிக நடவடிக்கைகளாக மாறியுள்ளதாக அவர் சுட்டிக்காட்டினார். குறிப்பாக, பெண்கள் உள்ளிட்ட பொருளாதார ரீதியாகப் பாதிக்கப்பட்ட மக்கள் இத்தகைய கடன்களால் பெரிதும் பாதிக்கப்படுவதாகவும் தெரிவித்தார்.
மேலும், சட்டங்களை இயற்றுவதுடன் மட்டும் நின்றுவிடாமல், கடனால் பாதிக்கப்பட்ட மக்களுக்கு நடைமுறையில் பயனளிக்கும் வகையில் கடன் நிவாரணத் திட்டங்களை அரசாங்கம் செயல்படுத்த வேண்டும் என்றும் சஜித் பிரேமதாச வலியுறுத்தினார்.
