திருகோணமலையில் இருந்து கொழும்பு நோக்கி புறப்பட்ட தனியார் சொகுசு பஸ் ஏ6 பிரதான வீதியில் வைத்து முழுமையாக தீக்கிரையாகியுள்ள சம்பவம் இன்று (11) அதிகாலை இடம்பெற்றுள்ளது.
ஹபரனை – ஜக்கா பங்குவ பகுதியை அண்மித்த 144 ஆம் கட்டைப் பகுதியில் வைத்து இன்றையதினம் அதிகாலை 3.00 மணியளவில் குறித்த பஸ் தீப்பற்றி முழுமையாக தீக்கிரையாகியுள்ளது.
குறித்த சம்பவத்தின்போது பஸ் சாரதி மற்றும் உதவியாளர் மாத்திரம் இருந்ததாகவும் அவர்கள் இருவரும் எந்தவித பாதிப்பும் இன்றி உயிர் தப்பியுள்ளதாகவும் தெரிய வருகிறது.
திருகோணமலைக்கு வர இருந்த வெளிநாட்டு சுற்றுலாப் பயணிகளை ஏற்றி வருவதற்காக சென்றபோதே இச்சம்பவம் இடம்பெற்றுள்ளது. சம்பவம் தொடர்பில் ஹபரனை பொலிஸார் மேலதிக விசாரணைகளில் ஈடுபட்டு வருகின்றனர்.
