நாட்டில் தற்போது நிலவும் மழையுடனான வானிலை காரணமாக, டெங்கு நுளம்புகளின் பெருக்கம் அதிகரிக்கும் அபாயம் காணப்படுவதால், நுளம்புகள் உற்பத்தியாகக்கூடிய இடங்களை உடனடியாக அகற்றுமாறு தேசிய டெங்கு ஒழிப்புப் பிரிவு பொதுமக்களிடம் கோரிக்கை விடுத்துள்ளது.
முறையான டெங்கு ஒழிப்பு நடவடிக்கைகள் முன்னெடுக்கப்படாவிட்டால், எதிர்காலத்தில் மீண்டும் டெங்கு அதிதீவிரப் பெருந்தொற்று நிலைமை உருவாகக்கூடும் என தேசிய டெங்கு ஒழிப்புப் பிரிவின் பதில் பணிப்பாளர் வைத்தியர் கபில கன்னங்கர எச்சரித்துள்ளார்.
மழைக்காலங்களில் டெங்கு நோயாளர்களின் எண்ணிக்கை அதிகரிப்பது வரலாற்று ரீதியாக அவதானிக்கப்பட்டுள்ளதுடன், தற்போது அனைத்து மாவட்டங்களிலும் டெங்கு நுளம்பு ஒழிப்புப் பரிசோதனைகள் முன்னெடுக்கப்பட்டு வருவதாகவும் அவர் தெரிவித்துள்ளார்.
தற்போது டெங்கு நோய் பரவல் கட்டுப்பாட்டுக்குள் கொண்டுவரப்பட்டுள்ள நிலையைத் தொடர்ந்து பேணுவதற்கு பொதுமக்களின் ஒத்துழைப்பு மிகவும் அவசியமானது எனவும் அவர் வலியுறுத்தியுள்ளார்.
கடந்த தென்மேற்குப் பருவமழைக் காலத்தில் ஏற்பட்ட தீவிர டெங்கு பரவல் மற்றும் பெருந்தொற்று நிலைமையைக் கட்டுப்படுத்துவதில் பொதுமக்களின் ஒத்துழைப்பு பெரும் பங்களிப்பை வழங்கியதாகவும் அவர் சுட்டிக்காட்டியுள்ளார்.
எனவே, மீண்டும் இத்தகைய நிலைமை ஏற்படுவதைத் தவிர்ப்பதற்காக வீடுகள் மற்றும் சுற்றுப்புறங்களில் நீர் தேங்கக்கூடிய இடங்களைத் தொடர்ந்து பரிசோதிக்குமாறும், நீர் தேங்குவதைத் தடுப்பதுடன் நுளம்புகள் உற்பத்தியாகக்கூடிய இடங்களை உடனடியாக அகற்றுமாறும் பொதுமக்கள் கேட்டுக்கொள்ளப்பட்டுள்ளனர்.
டெங்கு பரவலைத் தடுப்பதற்கு அரச அதிகாரிகளின் நடவடிக்கைகளுடன் பொதுமக்களின் ஒத்துழைப்பும் அவசியம் என்பதால், அனைவரும் பொறுப்புடன் செயற்பட வேண்டும் என தேசிய டெங்கு ஒழிப்புப் பிரிவு வலியுறுத்தியுள்ளது.
