தூக்கக் கலக்கத்தில் ஓட்டுநர்! அதிவேக நெடுஞ்சாலையில் கோர விபத்து

தெற்கு அதிவேக நெடுஞ்சாலையில் பின்னதூவ பகுதிக்கு அருகில் இடம்பெற்ற வாகன விபத்தில் 65 வயதுடைய பெண் ஒருவர் உயிரிழந்துள்ளார்.

மத்தல நோக்கிப் பயணித்த வேனின் ஓட்டுநர் உறங்கியதால், அதே திசையில் பயணித்துக் கொண்டிருந்த லொரியின் பின்புறத்தில் வேன் மோதியுள்ளதாகத் தெரிவிக்கப்படுகிறது. இந்த விபத்து, தெற்கு அதிவேக நெடுஞ்சாலையின் 93.6 கிலோமீட்டர் மைல்கல் அருகே நேற்று (21) மாலை இடம்பெற்றுள்ளது.

விபத்தில் படுகாயமடைந்த வேன் ஓட்டுநரும், வேனின் முன் இடதுபுற இருக்கையில் பயணித்த அவரது தாயாரும் கராப்பிட்டிய போதனா வைத்தியசாலையில் சேர்க்கப்பட்டுள்ளனர்.

எனினும், வைத்தியசாலையில் சிகிச்சை பெற்று வந்த ஓட்டுநரின் தாயார் உயிரிழந்துள்ளார். உயிரிழந்தவர் கதிர்காமத்தைச் சேர்ந்த 65 வயதுடைய பெண் எனத் தெரிவிக்கப்படுகிறது.

இச்சம்பவம் தொடர்பில் பின்னதூவ அதிவேக நெடுஞ்சாலை கட்டுப்பாட்டு நிலையம் மேலதிக விசாரணைகளை முன்னெடுத்து வருகிறது.