அமெரிக்கா–இஸ்ரேல் மற்றும் ஈரான் இடையிலான போர் மீண்டும் ஆரம்பிக்கலாம் என்ற அச்சம் அதிகரித்துள்ள நிலையில், சர்வதேச சந்தையில் மசகு எண்ணெய் விலைகள் உயர்வடைந்துள்ளன.
சர்வதேச ஊடகங்கள் வெளியிட்டுள்ள தகவல்களின்படி, பிரெண்ட் (Brent) ரக மசகு எண்ணெய் விலை பீப்பாய் ஒன்றுக்கு 117.37 அமெரிக்க டொலர் வரை அதிகரித்துள்ளது. இது கடந்த ஏப்ரல் 30ஆம் திகதிக்குப் பின்னர் பதிவான அதிகபட்ச விலையாகும்.
அதேவேளை, அமெரிக்காவின் WTI ரக மசகு எண்ணெய் விலையும் பீப்பாய் ஒன்றுக்கு 103 அமெரிக்க டொலர் வரை உயர்ந்துள்ளது. இது கடந்த ஐந்து வாரங்களில் பதிவான அதிகபட்ச விலையாகும்.
மத்திய கிழக்கில் நிலவும் போர் பதற்றம் மற்றும் எண்ணெய் விநியோகத்தில் ஏற்படக்கூடிய பாதிப்புகள் குறித்த கவலைகள் சர்வதேச எரிசக்திச் சந்தையில் தாக்கத்தை ஏற்படுத்தியுள்ளன.
எண்ணெய் விலைகளில் ஏற்படும் தொடர்ச்சியான அதிகரிப்பு, எரிபொருள் செலவுகள் மற்றும் போக்குவரத்துச் செலவுகள் உள்ளிட்ட பல்வேறு துறைகளில் தாக்கத்தை ஏற்படுத்தக்கூடும் என எதிர்பார்க்கப்படுகிறது.
