ஐரோப்பிய நாடுகளில் இந்த ஆண்டு கோடைக்காலத்தில் ஏற்பட்ட கடும் வெப்ப அலை காரணமாக, நகர்ப்புறங்களில் மட்டும் 50,391 பேர் உயிரிழந்துள்ளதாகப் புதிய ஆய்வொன்றில் தெரிவிக்கப்பட்டுள்ளது.
இதற்கு முன்னர் அதிக கோடைக்கால உயிரிழப்புகள் பதிவான 2022ஆம் ஆண்டில் 29,480 பேர் உயிரிழந்ததாகக் கணிக்கப்பட்டிருந்தது. இந்நிலையில், இந்த ஆண்டு பதிவானதாகக் கூறப்படும் உயிரிழப்புகள் அந்த எண்ணிக்கையைவிட 71 சதவீதம் அதிகமாகும்.
மனித நடவடிக்கைகளால் தீவிரமடைந்து வரும் காலநிலை மாற்றம், வெப்ப அலைகளின் தாக்கத்தை அதிகரித்து இத்தகைய உயிரிழப்புகளுக்குப் பங்களிப்பதாக விஞ்ஞானிகள் எச்சரித்துள்ளனர்.
இம்பீரியல் கல்லூரி லண்டன் (Imperial College London) மற்றும் லண்டன் சுகாதாரம் மற்றும் வெப்பமண்டல மருத்துவப் பள்ளி (London School of Hygiene & Tropical Medicine) ஆகியவற்றின் ஆராய்ச்சியாளர்கள் இணைந்து இந்த ஆய்வை மேற்கொண்டுள்ளனர்.
கடும் வெப்பம் குறிப்பாக நகர்ப்புறங்களில் வாழும் மக்களின் உயிருக்கு அச்சுறுத்தலாக மாறிவருவதால், காலநிலை மாற்றத்தின் தாக்கங்களைக் குறைப்பதற்கும், வெப்ப அலைகளின்போது மக்களைப் பாதுகாப்பதற்கும் உரிய நடவடிக்கைகள் அவசியம் என இந்த ஆய்வு சுட்டிக்காட்டுகிறது.
