நீர்ப்பாசனத் திணைக்களத்தின் கட்டுப்பாட்டிலுள்ள சுமார் 38 மத்திய மற்றும் பெரிய அளவிலான நீர்த்தேக்கங்கள் தற்போது வான்பாய்ந்து வருவதாக திணைக்களத்தின் பணிப்பாளர் பொறியியலாளர் எல்.எஸ். சூரியபண்டார தெரிவித்துள்ளார்.
தெதுரு ஓயா, இராஜாங்கனை, இங்கினிமிட்டிய, யான் ஓயா மற்றும் உஸ்கல சியம்பலன்கமுவ உள்ளிட்ட பல நீர்த்தேக்கங்களில் வான்பாயும் நீர்மட்டம் உயர்வடைந்துள்ளதாக அவர் குறிப்பிட்டுள்ளார்.
தற்போது பாரிய வெள்ளப்பெருக்குக்கான அபாயம் அவதானிக்கப்படவில்லை என்றாலும், பல ஆறுகள் மற்றும் நீர்த்தேக்கங்களின் நீர்மட்டம் உயர்ந்த நிலையிலேயே காணப்படுகிறது.
களனி கங்கை மற்றும் களு கங்கையின் மேல்நிலைப் பகுதிகளில் 40 முதல் 60 மில்லிமீற்றர் வரையிலான மழைவீழ்ச்சி பதிவாகியுள்ளதுடன், நில்வளா, கிங், களு மற்றும் களனி ஆறுகளை அண்டிய சில தாழ்நிலப் பகுதிகளில் சிறிய அளவிலான வெள்ள நிலைமை தொடர்கிறது.
குறிப்பாக மாத்தறை, பத்தேகம, களுத்துறை, கம்பஹா, கடான மற்றும் ஜா-எல உள்ளிட்ட பகுதிகளில் நீர்மட்டம் உயரக்கூடும் என எச்சரிக்கப்பட்டுள்ளது.
இன்றும் மழைவீழ்ச்சி எதிர்பார்க்கப்படுவதால், ஆறுகள் மற்றும் தாழ்நிலப் பகுதிகளில் நீர்மட்டம் மீண்டும் உயரக்கூடும் என நீர்ப்பாசனத் திணைக்களம் தெரிவித்துள்ளது.
எனவே, நீர் தேங்கியுள்ள பகுதிகளில் நீராடுதல், நீர் விளையாட்டுகளில் ஈடுபடுதல் உள்ளிட்ட ஆபத்தான செயற்பாடுகளைத் தவிர்த்து, அவதானத்துடன் இருக்குமாறு பொதுமக்கள் கேட்டுக்கொள்ளப்பட்டுள்ளனர்.
