கலகொடஅத்தே ஞானசார தேரரை விடுதலை செய்யக் கோரி கொழும்பு விஹாரமகாதேவி பூங்காவில் நடத்தப்பட்ட போராட்டத்தின்போது, உரிய அனுமதியின்றி ஒலிபெருக்கிகளைப் பயன்படுத்தியவர்களைக் கைது செய்யுமாறு கொழும்பு மேலதிக நீதவான் லஹிரு சில்வா குருந்துவத்தை காவல்துறையினருக்கு உத்தரவிட்டுள்ளார்.
அத்துடன், போராட்டத்தின்போது பதாகைகள் மற்றும் சுவரொட்டிகளை அகற்றச் சென்ற கொழும்பு மாநகர சபை அதிகாரிகள் மற்றும் பூங்கா பொறுப்பதிகாரியின் கடமைகளுக்கு இடையூறு விளைவித்தவர்களையும் கைது செய்யுமாறு நீதிமன்றம் உத்தரவிட்டுள்ளது.
குருந்துவத்தை காவல்துறையினர் தாக்கல் செய்த இரண்டு முறைப்பாடுகளைப் பரிசீலித்த பின்னரே இந்த உத்தரவுகள் பிறப்பிக்கப்பட்டுள்ளன.
போராட்டத்தில் ஈடுபட்டவர்கள் நீதிமன்ற உத்தரவுகளைப் பொருட்படுத்தாமல் தொடர்ந்து ஆர்ப்பாட்டத்தில் ஈடுபட்டதாகவும், அனுமதியின்றி ஒலிபெருக்கிகளைப் பயன்படுத்தியதாகவும் காவல்துறையினர் நீதிமன்றத்தில் தெரிவித்துள்ளனர்.
இதன்படி, சம்பவம் தொடர்பான சிசிடிவி மற்றும் காணொளிப் பதிவுகளைப் பரிசோதித்து, அரச அதிகாரிகளின் கடமைகளுக்கு இடையூறு விளைவித்தவர்களை அடையாளம் கண்டு கைது செய்து நீதிமன்றத்தில் முன்னிலைப்படுத்துமாறு நீதவான் உத்தரவிட்டுள்ளார்.
இதேவேளை, போராட்டம் நிறைவடைந்துள்ளதாக காவல்துறையினர் அறிவித்ததைத் தொடர்ந்து, அதுதொடர்பான இடைக்கால நீதிமன்ற உத்தரவு தொடர்பான முறைப்பாட்டை முடிவுக்குக் கொண்டுவரவும் நீதிமன்றம் இன்று (04) உத்தரவிட்டுள்ளது.
