யாழ்ப்பாணம், வட்டுக்கோட்டை அராலி மத்தி பகுதியில் 74 வயதுடைய வயோதிபப் பெண் ஒருவர் படுகொலை செய்யப்பட்ட நிலையில் சடலமாக மீட்கப்பட்டுள்ளார்.
நேற்று (18) இச் சம்பவம் இடம்பெற்றுள்ளதுடன், உயிரிழந்த பெண்ணின் மகனை வட்டுக்கோட்டை பொலிஸார் கைது செய்துள்ளனர்.
அராலி மத்தி பகுதியைச் சேர்ந்த 74 வயதுடைய பெண்ணே கொலை செய்யப்பட்டுள்ளதாக பொலிஸார் தெரிவித்தனர்.
வீட்டில் சடலம் இருப்பதாகக் கிடைத்த தகவலையடுத்து பொலிஸார் நடத்திய சோதனையில் சடலத்தில் காயங்கள் காணப்பட்டமையினாலும், பொருட்கள் சிதறடிக்கப்பட்டிருந்தமையினாலும் சந்தேகம் உருவானது.
நீதிமன்ற உத்தரவின் பேரில் யாழ்ப்பாணம் போதனா வைத்தியசாலையில் மேற்கொள்ளப்பட்ட உடற்கூற்றுப் பரிசோதனையில் இது கொலை என உறுதி செய்யப்பட்டுள்ளது.
உயிரிழந்த பெண்ணும் அவரது மகனும் மட்டுமே வீட்டில் வசித்து வந்த நிலையில், சம்பவத்துடன் தொடர்புடைய சந்தேகத்தின் பேரில் மகனை வட்டுக்கோட்டை பொலிஸார் கைது செய்துள்ளனர்.
கைது செய்யப்பட்ட நபர் கடந்த சில வருடங்களுக்கு முன்பு பல இலட்சம் ரூபா பண வீதியில் வீசியதுடன், பெருந்தொகை பணத்தை சேதப்படுத்தியவர் என்பதும் தெரியவந்துள்ளது.
சந்தேகநபரை நீதிமன்றத்தில் ஆஜர்படுத்துவதற்கான நடவடிக்கைகளை வட்டுக்கோட்டை பொலிஸார் முன்னெடுத்து வருகின்றனர்.
